Gvardiola Alonso haqida: "Real" va "Barsa"ga murabbiylik qilish – eng qiyini. Xabi bu vaziyatdan chiqib ketishga qodir"

Kecha "Real" "Siti"ga qarshi o'yinda muvaffaqiyatsizlikka uchrasa, Alonsoni istefoga chiqarishi mumkinligi, bosh murabbiy va futbolchilar o'rtasidagi munosabatlar buzilganligi haqida xabarlar tarqaldi. Xabining o'rniga asosiy nomzodlar - Zinedin Zidan va Yurgen Klopp. Shuningdek, "oq kiyimlilar" ro'yxatida Alvaro Arbeloa ham bor. "Real" "Selta"dan mag'lubiyatga uchragach (0:2), La Liga turnir jadvalida "Barselona"dan 4 ochko orqada qoldi. Pep Gvardiolaga esa Xabi Alonso haqida savollar berildi.

- Ertaga Xabining ishi xavf ostida qolishi mumkinligi sizni ajablantirmaydimi?

- Yo'q... Siz mendan Xabining kelajagi haqida so'rayapsiz, men esa unga eng yaxshi tilaklarni bildiraman, chunki uni juda hurmat qilaman. Lekin javobini bilmayman. Vaziyatni bilasiz-ku, men bu erda yashamayman va uzoqdaman.

- Siz hozir Alonsoning ahvoliga achinayapsizmi?

- Albatta. Biz "Bavariya"da ikki yarim yil birga ishlaganmiz va bu ajoyib edi. Bizda umumiy jihatlar ko'p edi.

Ammo "Barselona" va "Real" - bosim va muhit tufayli murabbiy uchun eng qiyin klublar. Mavsum og'ir kechmoqda va hamma narsa g'alabalar atrofida aylanmoqda... G'olib bo'lmasang, nima bo'lishini bilasan. O'tgan mavsumda men bilan ham shunday bo'lgandi. Ammo Xabi bu vaziyatdan chiqib ketishga qodir.

- Alonsoga qanday maslahat bergan bo'lardingiz?

- O'z ishini qilaversin. Uning hamma ishi joyida bo'ladi, mana ko'rasiz.

- Xabi boshchiligidagi bu "Real" jamoasini siznikiga qiyoslasa bo'ladimi?

- Hech qaysi jamoa menikiga teng kelolmaydi, mening jamoalarim ajoyib. Har bir jamoa o'ziga xos. Sportda doimo qadam-baqadam o'sib borish kerak. Turli bosqichlar bor. Mavsum davomida rivojlanganlar g'olib bo'ladi. Bu jarayonda jarohatlar, kutilmagan vaziyatlar va boshqalar tufayli o'yin darajasi pasaygan paytlar ham bo'ladi. Men oktyabrda jamoa sentyabrga qaraganda yaxshiroq bo'lishini va shunday davom etishini xohlayman. Mavsum yakunida esa yakuniy xulosa chiqariladi, - dedi Gvardiola.