Filip Rayevac - mart oyining eng yaxshi futbolchisi

CHempionatimizning dastlabki oyida "Qo'qon-1912" jamoasi legioner hujumchisi Filip Rayevac juda ham foydali o'yin namoyish eta oldi.


Bu yil oliy ligada debyutini o'tkazayotgan Rayevac dastlabki 4ta turda raqiblari darvozasiga uchta gol urishga muvaffaq bo'ldi. U faqat ilk turda "Nasaf"ga qarshi bahsda gol ura olmadi xolos. O'sha bahsda u zaxiradan o'yinga qo'shilgan edi.

Ikkinchi turda qo'qonliklar Toshkentda "Obod" mehmoni bo'lishdi. "Jar"da kechgan uchrashuvda Filip O'zbekiston chempionatidagi o'zining birinchi golini urishga muvaffaq bo'ldi. O'sha kuni No'mon Hasanov shogirdlari bir ochko bilan uylariga qaytishdi.

Keyin "Qo'qon-1912" o'z maydonida "Qizilqum"ni qabul qildi. O'tgan mavsum vodiy klublarining barchasini safarda mag'lub etib ketgan "Qizilqum"ga qarshi uchrashuv taqdirini aynan Rayevacning kiritgan to'pi hal qildi - 1:0.

Farg'onada "Neftchi" bilan bo'lgan vodiy derbisida ham hujumchi o'zini ko'rsata oldi. Aynan u 19-daqiqada sheriklari boshlab bergan hujumni samarali yakunlab hisobni ochgandi. Yakunda "Qo'qon-1912" ashaddiy raqibi ustidan 2:1 hisobida g'alabaga erishib qaytgandi.

championat.asia talqiniga ko'ra mart oyining eng yaxshi futbolchisi deb "Qo'qon-1912" hujumchisi Filip Rayevac tan olindi.

Mart oyida shuningdek "Nasaf" hujumchisi Dragan CHeran, "Lokomotiv" vakili Marat Bikmaev, "Dinamo" yarim himoyachisi Akmal Bozorov kabi futbolchilar ham laureat bo'lishga loyiq o'yin namoyish etishdi.