FIFAdan yangilik: Endi jarohat olgan futbolchilar maydon tashqarisida 1 daqiqa qolishga majbur bo'ladi!

FIFA jarohat tufayli tibbiy yordam olgan futbolchilar uchun maxsus cheklov joriy etishni taklif qildi.

Yangi qoidaning mazmuni:

Agar futbolchi maydonda tibbiy yordam olsa, u maydonga qaytish uchun kamida bir daqiqa kutishi shart bo'ladi. Bu haqdagi qaror shanba kuni Xalqaro futbol associaciyalari kengashining (IFAB) yillik yig'ilishida rasman tasdiqlanishi kutilmoqda.

Nima uchun aynan bir daqiqa?

Dastlab FIFA dekabr oyida bo'lib o'tgan Arab davlatlari kubogida ikki daqiqalik cheklovni sinovdan o'tkazgan edi.

Biroq bu taklif "keskin qarshilikka" uchradi. Ko'pchilik ikki daqiqalik kamchilik jamoa uchun gol o'tkazib yuborish xavfini haddan tashqari oshirib yuborishini takidladi.

Kompromiss sifatida bir daqiqalik variant tanlandi.

Istisno holatlar kimlar uchun?

Yangi qoida hammaga ham tegishli bo'lmaydi. Quyidagi holatlarda futbolchi maydon tashqarisida kutishi shart emas:

Agar raqib futbolchisiga ushbu qo'pollik uchun sariq yoki qizil kartochka ko'rsatilgan bo'lsa.

Darvozabonlar jarohat olsa.

Penalti tepishi kerak bo'lgan futbolchiga tibbiy yordam kerak bo'lsa.

Xavotirlar bormi?

Mutaxassislarning fikricha, bu qoida haqiqatdan ham jarohat olgan futbolchilarni nohaq jazolab qo'yishi mumkin. Ammo ataylab vaqt cho'zuvchi "simulyatorlar"ga qarshi bu eng samarali vosita bo'lishi kutilmoqda.