Farhod Nishonov: "Osiyo Kubogi saralashi bo'yicha malumot yo'qligi bizni qiyin ahvolga solmoqda"

Bugun termamizning mashg'ulotidan keyin jamoa ustozi Farhod Nishonovdan kichik intervyu olishga muvaffaq bo'ldik.

"Jamoa kecha yig'inni boshladi. 1 iyun sanasida esa terma jamoa delegaciyasi Xitoyga uchib ketadi. FIFA kunlari 3 iyundan boshlanishi sababli qator futbolchilarimiz "Paxtakor", "Bunyodkor" kabi klublarda asosiy tarkibda o'ynashmoqda, bu quvonarli holat. Ana shu yigitlar klublaridagi o'yinlarni o'tkazib, termaga Xitoyda qo'shilishadi. 

Dastlab koreyslar bilan o'ynaymiz. Bu terma jamoa Osiyoning eng kuchli jamoalaridan biri bo'lib kelgan va ortiqcha gapga o'rin yo'qdek. SHuningdek, Xitoy va Vetnam bilan ham kuch sinashamiz. Vetnam futboli shu qadar tez rivojlanmoqdaki, biz ularga qarshi bahsga jiddiy tarzda tayyorgarlik ko'ryapmiz. 

Albatta, biz oldimizga har doim yuqori maqsad qo'yamiz va har bir musobaqada birinchi o'rinni egallashga harakat qilamiz. Hozircha vazifalarni yaxshi uddalayapmiz.

Osiyo Kubogiga saralash qachon va qaerda bo'lishi hali aniq emas, kim qaysi savatchada bo'ladi, kimlar raqib bo'ladi — hozircha bilmaymiz. SHu sababli juda ham qiynalyapmiz. Faqatgina  sentyabr oyida bo'lishi haqida malumot bor. Sentyabrgacha ham oz vaqt qoldi. Agarda yangilik bo'lsa, shunga qarab tayyorgarlik ko'rardik. 

Xitoydagi musobaqadan keyin ham yig'in rejalashtirganmiz. Navbatdagi FIFA kunlari sentyabr oyida, ammo saralash o'yinlarimiz bu oyda emas. PRO-Liga o'yinlari, "CAFA musobaqasi" bor, lekin u ham FIFA kuniga to'g'ri kelmaydi. SHuning uchun klublarimiz etakchi futbolchilarimizni qo'yib yubormasligi mumkin. Natijada, asosiy futbolchilarsiz o'yinlarga tayyorgarlik ko'rishimizga to'g'ri kelmoqda — bu juda ham katta muammo bo'lmoqda.     

Tarkibdagi futbolchilarimiz, ularning salohiyatidan kelib chiqib, biz bundanda chiroyliroq o'yin namoyish qila olamiz, bunga vada beraman".