Ekspert fikri. Miodrag Radulovich: "Neftchi" - "Nasaf" natijasini oldidan aytib bo'lmaydigan o'yin, bu tur jadvalda jiddiy o'zgarish qilishi mumkin"

Mazkur tur oldidan chernogoriyalik mutaxassis, "Paxtakor" sobiq ustozi Miodrag Radulovich o'z fikr-mulohazalarini bildirdi. Uning so'zlariga ko'ra, oldindagi markaziy qarama-qarshiliklar nafaqat muxlislarga  yuqori hissiyotlarni beradi, balki chempionat jadvalining holatiga oid muhim savollarga javob beradi.

"Superliganing navbatdagi turi masuliyatli va qizg'in  o'yinlarni taqdim etadi. Bu o'yinlar muxlislar uchun haqiqiy zavq manbai bo'lib, shu bilan birga, chempionat jadvalining yakuniy ko'rinishi haqida muhim malumotlar beradi",-  deydi Radulovich.

— "Nasaf" joriy mavsumda barqaror o'yin ko'rsatmoqda: ular jadvalda birinchi o'rinni egallab turibdi va chempionlik uchun yaxshi imkoniyatga ega. "Neftchi" esa so'nggi to'rt uchrashuvda uch marotaba g'alaba qozonib, yaxshi formada ekanligini isbotladi. Agar "Neftchi" ushbu o'yinda zafar quchsa, u chempionlik uchun eng jiddiy nomzodga aylanadi. Bu o'yin ikki jamoa muxlislari uchun hayajonli va natijasi kutilmagan bo'ladi.

— "Dinamo" bu mavsumda ajoyib natijalar ko'rsatmoqda – bu ularning o'yinlari va jadvaldagi o'rnidan ham ko'rinib turibdi. Murabbiy Vadim Abramov tajribali va yaxshi shakllangan jamoa tuza oldi. Ular o'z maydonlarida ham, safarda ham barqaror o'ynamoqda. Yosh istedodlar – Halilov, O'rozov va Oblaqulov jamoaga o'zgacha rang-baranglik olib kirmoqda. “Paxtakor” esa mavsumni noqulay o'tkazmoqda: jamoa “issiq-sovuq” o'yin uslubida harakatlanmoqda. So'nggi turda OKMKga yutqazgan "Paxtakor" uchun "Dinamo" bilan o'yin jadvalda yuqori o'rinlarni saqlab qolish yo'lida hal qiluvchi ahamiyatga ega. Ishonchim komilki, murabbiy Kamoliddin Tojiev “Paxtakor”ni muvaffaqiyatli yo'lga qaytarishga erishadi.

— "Andijon" so'nggi natijalari bilan jamoaning yaxshilanganini ko'rish mumkin: oltita o'yinda faqat bir marta "Bunyodkor"ga imkon berib, ikkita g'alaba va uchta durang qayd etdi. “Navbahor”ga qarshi g'alaba ularga musobaqaning qolgan qismida barqaror harakatlanish imkonini beradi. "Navbahor" esa natijalar bo'yicha qiyin vaziyatda: so'nggi 3 ta  o'yinda g'alabasiz ketmoqda. “Andijon” bilan bellashuv ularning jadval yuqorisi uchun kurashishga qaytish imkoniyatini ko'rsatadi.

— Umuman olganda, bu tur juda qiziqarli va natijalari kutilmagan o'yinlarga boy bo'ladi deb o'ylayman. Uchta markaziy o'yin musobaqaning davomi qanday o'tishini belgilab beradi va muxlislar uchun haqiqiy futbol bayramiga aylanadi. Kechagi "Sho'rtan" va "Surxon" ishtirokidagi o'yinlar bu yilgi chempionatning teng raqobatda o'tayotganini yana bir bor isbotladi. Tanaffus vaqtida barcha jamoalar mustahkamlanib, kuchliroq holatda qaytdi – bu esa musobaqa oxirigacha yanada ko'proq kutilmagan natijalarni vada qiladi.