Derbi oldidan. O'zaro o'yinlarda Manchesterning qaysi tomoni ustun? (prevyu)

Xo'sh, bugungi uchrashuv oldidan statistikalarda ustunlik qaysi jamoa tomonida?

O'zaro o'yinlar

SHu kunga qadar jamoalar o'zaro 188 marta (barcha turnirlarda) o'zaro to'qnash kelishgan. SHularning 57tasida shaharning ko'k tomoni, 78tasida esa qizil tomonining qo'li baland kelgan. Premer-liga, umuman olganda Angliya chempionati doirasidagi uchrashuvlar esa 154tani tashkil qiladi. Uchrashuvlarning 47tasida "Siti", 59tasida esa "Yunayted" g'alabaga erishgan. Garchi mag'lubiyatlarning ko'pligiga qaramasdan "Siti" gol urish bobida raqibidan ustun - 214:212.

So'nggi 5 o'yin

APL. 06.03.2022 | Manchester Siti - Manchester Yunayted 4:1

APL. 06.11.2021 | Manchester Yunayted - Manchester Siti 0:2

APL. 07.03.2021 | Manchester Siti - Manchester Yunayted 0:2

Liga Kubogi. 06.01.2021 | Manchester Yunayted - Manchester Siti 0:2

APL. 12.12.2020 | Manchester Yunayted - Manchester Siti 0:0

Turnir jadvali

Ikki jamoa ham 2 uchrashuvda ochko yo'qotdi: farq shundaki "Siti" 2 durang o'ynadi, "Yunayted" esa mavsumni ikki mag'lubiyat bilan boshladi. Ayni damda Erik ten Xag shogirdlari 8-8 gollar bilan 12 ochko to'plagan holda 6-o'rinda qayd etilgan bo'lsa, 23 gol urib, 6 gol qo'yib yuborgan "Siti" 17 ochko bilan peshqadam "Arsenal"ni taqib qilmoqda. O'z navbatida qayd etish kerak, mankunianliklarning "Lids"ga qarshi o'yini qirolichaning vafoti sababli boshqa kunga qoldirilgan.

Jamoalarning holati

"Manchester Yunayted" so'nggi 6 o'yinning 5tasida g'alabaga erishdi. Birgina mag'lubiyat Evropa ligasi doirasida "Real Sosedad"ga qarshi o'yinda qayd etildi. Jamoa o'zining jonajon stadionida 0:1 hisobida mag'lub bo'ldi. O'z navbatida jamoaning APL peshqadami "Arsenal"ni mag'lub etganini qayd etish lozim.

"Manchester Siti"da esa ishlar ajoyib. Birgina Erling Xolandning o'zi "Yunayted"dan ko'proq gol ura oldi. SHuningdek, ECHL va APLda mag'lubiyatsiz seriyani qayd etayotgan "shaharliklar" uchrashuv oldidan favorit maqomini saqlab turibdi. Gvardiola shogirdlari ushbu mavsum o'tkazgan 9 o'yinining 4tasida yirik g'alabaga erishdi.

Yo'qotishlar

Bu borada "Yunayted"da nomlar salobatliroq. Xarri Maguayr, Markus Reshford, Donni van de Bek va Antoni Marsyal kabi futbolchilar uchrashuvda ishtirok etmasligi kutilmoqda. SHuningdek, bahsda jarohati sababli qaydnomaga kiritilmaydiganlar qatorida Brendon Uilyams, Martin Dubravka va Fakundo Pelistri kabi futbolchilar ham bor.

"Man Siti"da esa Jon Stounz hamda Aymerik Lyaport kabi himoyachilar bahsda qatnashmaydi. SHuningdek, ushbu mavsum 1 daqiqagina o'ynagan Kelvin Fillips jarohatlangan.

Xo'sh, Sizningcha uchrashuvda qanday hisob qayd etilishi mumkin?