Denis Korostichenko: "Maqsadlar har doimgidek yuqoriligicha qoladi. CHempionlar Ligasiga chiqishga harakat qilamiz"

"Birinchi navbatda, hammaga salom! “Navbahor”ni g'alaba bilan tabriklayman! O'ylashimcha, yaxshi o'yin guvohiga aylandik. Bugun ikki bo'limda ikki xil o'yin ko'rsatdik. Birinchisida ko'proq to'pga egalik qildik, ikkinchisida esa... Menimcha, bunga “Navbahor”ning ikkinchi bo'limda o'yinini biroz kuchaytirgani ham sabab bo'ldi. Va albatta, muxlislaringiz ham jamoani oldinga undashdi. Ikkinchi bo'limning dastlabki qismida biroz “uxlab” qoldik, oqibatda xato yuzaga keldi va gol urildi. Umuman olganda, muxlislar o'yindan yaxshi taassurot olishdi.

Hisob 0:1 bo'lib turganida, hujumni kuchaytirishimizga to'g'ri keldi, yangi kuchlarni maydonga tashladik. Afsuski, bugungi kunda markaziy hujumchilar va qanotdagi hujumkor futbolchilar borasida tanlov imkoniyatlarimiz katta emas. Qanotlar va maydon markazini kuchaytirishni maqsad qilgandik, G'ulom-Haydarni zaxiradan o'yinga qo'shdik. U yaxshi o'yin o'tkazdi, menimcha. 

Birinchi bo'limda to'pga ishonch bilan egalik qilishimizni “Navbahor” kutmagan ekan, shekilli. Afsuski, to'pni yaxshi egallab turganimizga qaramay, hujumlarni samarali yakunlay olmadik, keskinlik etishmadi. O'ylashimcha, “Navbahor” birinchi bo'limda biroz passiv harakat qildi. 

“Navbahor”ning o'yinini anchadan buyon kuzatib kelamiz. Menimcha, bu jamoa bugungi uchrashuvning ikkinchi bo'limida, so'nggi 2-3 turdagi eng yaxshi o'yinini ko'rsatdi. 

“Lokomotiv” har doim o'z oldiga yuqori maqsadlar qo'yadi. Lekin bu yil asosan yosh futbolchilarga imkoniyat berishga qaror qilganmiz. Bizda tarkibni yoshartirish jarayoni ketmoqda. Maqsadlar esa har doimgidek yuqoriligicha qoladi, jumladan, CHempionlar Ligasiga chiqishga harakat qilamiz. Oldinda o'yinlar ko'p. 

Bugungi uchrashuvda “Navbahor” safida Yovan Jokichning harakatlarini etirof etishim mumkin. Davronbek Hoshimov ham o'z saviyasidagi o'yinni ko'rsatdi. Umuman olganda, mezbonlar safida ikkinchi bo'limda hamma futbolchilar yaxshi to'p tepishdi, - dedi Denis Korostichenko.