Branko Ivankovich kechagi savolni esladi va hakamlikdan ochiqchasiga norozi bo'ldi - matbuot anjumani

Branko Ivankovich: - Kecha eronlik jurnalist hakamlarning ehtimoliy xatolaridan qo'rqmaysizmi deb so'ragandi. Men esa buni shunchaki futboldagi holat sifatida baholagandim. Bugun esa aynan hakamlikdan ko'nglim to'lmadi. Bunga qadar OCHLda 4 o'yin o'tkazdik. Birinchi bahs aynan "Paxtakor" bilan bo'lgandi. O'shanda "Paxtakor" jamoamizga yaqqol offsayddan gol urgandi. Hakam esa hisoblagan. "Al Sadd" bilan o'yinda ham yana offsayddan gol urishdi va bu hisoblandi. Bugun ham jamoamiz foydasiga berilishi kerak bo'lgan yaqqol penalti belgilanmadi. "Paxtakor"ga qarshi o'yinda gol urish uchun 20-25 vaziyat yaratishning iloji yo'q. Har ikkala jamoa bugun yaxshi o'ynadi va keskin harakat qildi. Lekin hakamlar raqibning asosiy futbolchisiga aylandi.

Odatda men hakamlar ishini muhokama qilmayman. Lekin bugungi hakamlik menga yoqmadi. Bu haqiqat. O'tgan yili ham, joriy mavsumda ham OCHLda bizga qarshi hakamlik juda yomon holatda bo'lmoqda. Aynan hakamlarni deb biz kamida 4 ochkodan mahrum bo'ldik. "Persepolis"ni Osiyoda hakamlik buzib tashlamoqda. O'tgan yili Yaponiyada ham bizga qarshi shunday holat yuzaga kelgandi.

"Paxtakor" oson raqib emas. Ularga qarshi ko'plab vaziyatlar yaratishning imkoni yo'q. Jamoa yaxshi himoyalandi, qo'shimchasiga darvozabon "Paxtakor"ni gollardan qutqardi. Bugun aynan u jamoaning qahramoniga aylandi.

Jismoniy holat? To'g'ri, har 4-5 kunda futbol o'ynash og'ir. Lekin men muvaffaqiyatsizlikka buni sabab sifatida ko'rsatmagan bo'lardim. Bugun ham yaxshi o'ynadik aslida.

"Al Sadd" musobaqa favoriti. Ular juda kuchli jamoa. Menimcha, "Al Sadd" bilan birgalikda "Paxtakor" jamoasi pley-off bosqichiga yo'l olishadi.