Bernardu Silva "Barselona"ga o'tmoqchi, ammo kataloniyaliklar ikkilanishmoqda

Portugaliyalik futbolchining ingliz klubi bilan shartnomasi yakuniga etmoqda. U Saudiya Arabistonidan kelayotgan manfaatli takliflarga qaramay, yuqori darajada qolishni istamoqda. "Diario Sport" nashrining xabariga ko'ra, Silva o'z agenti Jorje Mendesh orqali "ko'k-anorranglilar"ga o'tishga tayyor ekanligini malum qilgan.

Bernardu anchadan beri kataloniyaliklar qiziqishlar doirasida bo'lib kelgan. Avvalroq "Barsa" uni sotib olishga yaqin kelgan, biroq avval Rafinya transferi ustuvor deb hisoblangan, keyinchalik esa maoshlar limiti sababli kelishuv amalga oshmay qolgan edi.

Hozirda "Barselona" rahbariyati ushbu transfer borasida bir qarorga kela olmayapti. Klubdagi manbalarning takidlashicha, yangi loyiha doirasida markaziy chiziqni kuchaytirish rejalashtirilmagan: asosiy urg'u o'z tarbiyalanuvchilariga qaratilmoqda. Mavjud mablag'lar hujum chizig'i yoki markaziy himoyachi uchun sarflanishi mumkin.

Bernarduga boshqa klublardan ham takliflar bor. Xususan, "Yuventus" va "Benfika" futbolchiga qiziqish bildirmoqda. Biroq portugaliyalik yulduz APLdagi faoliyati yakunlandi deb hisoblamoqda va Barselona shahriga ko'chib o'tishni istaydi. Chunki bu erda uning yaqinlari istiqomat qiladi.

Yakuniy qaror esa "Barselona"ning kelgusi rejalariga bog'liq bo'lib turibdi.