Bekzod Mamatqulov: "2026 yildan barcha futzal klublari alohida yuridik tashkilotga aylanadi. Endi futbol klublariga og'irligi tushmaydi. Ronaldino bilan kelishib olgandik, lekin..."
25 avg 15:05
Yangiliklar

Bekzod Mamatqulov: "2026 yildan barcha futzal klublari alohida yuridik tashkilotga aylanadi. Endi futbol klublariga og'irligi tushmaydi. Ronaldino bilan kelishib olgandik, lekin..."

Ertaga bo'lib o'tadigan futzal bo'yicha Superkubok uchrashuvi oldidan poytaxtdagi "Wyndham Tashkent" mehmonxonasida O'FF rahbariyatining OAV vakillari bilan brifingi o'tkazildi.

Brifingda so'z olgan O'FF prezidenti Bekzod Mamatqulov quyidagilarni aytib o'tdi:

"2026 yildan barcha futzal klublari alohida yuridik tashkilotga aylanadi. Endi futbol klublariga og'irlik tushmaydi. Hozir 85 foiz klublarimiz mana shunday tashkilotga aylanib bo'ldi.
Yangi mavsumda O'zbekiston chempionatida 31 nafar legioner o'ynaydi. 12 ta klubning 8 tasida legioner bor. Klublar yana 10 kun ichida legioner futzalchini qo'shib olishlari mumkin.
O'zbekiston chempionatidagi klublar qaydnomaga majburan 1 nafar yosh, o'smirni qo'shib olishlari shart etib belgiladik. Shunday qilmasak, O'zbekiston o'smirlar terma jamoasi rivojlanmaydi.
Bu yil futzal klublarining yillik byudjeti 4 milliard so'mga etdi. Minimal maoshni 5 million so'm qildik.
O'zbekiston chempionati 7 sentyabr kuni start oladi. 1 ta turda 36 ta o'yin bo'ladi. Yani 12 ta klub 3 ta uchrashuv o'tkazadi. Hozircha tur o'yinlari markazlashgan holda o'tadi.
O'tgan mavsum bir klub 16 nafar futzalchidan 9 nafariga maosh bergan va qolgani quruq rahmatga o'ynagan.
27 avgust kuni jahon yulduzlari va o'zbek futboli afsonalari o'rtasidagi bahs bo'lib o'tadi. Afsuski, unga hammani taklif qila olmaymiz. Sababi xavfsizlik masalasi. Hozir Toshkentda bitta yaroqli stadion qoldi: "Jar". Shu kunlarda Toshkentda CAFA musobaqasi bo'lib o'tayotgan bo'ladi. Viloyatlarga mehmonlarni olib chiqa olmaymiz. Sababi ularni olib kelish oson bo'lmayapti.
Roberto Karlos qarib qolgan deb yozishmoqda. Lekin u baribir Karlos!
Masalan, ertangi tadbirga kelish bo'yicha Ronaldino bilan kelishib olgandik, pullar bo'yicha kelishgandik, lekin uchib ketish borasida muammo yuzaga kelgani bois u kela olmaydigan bo'ldi".
Kelajakda terma jamoada braziliyalik futzalchi o'ynashi mumkinmi? Shaxsan men bunga qarshi emasman, lekin futzalchi o'sha mamalakatda kamida 5 yil o'ynagan bo'lishi kerak. Mening principim shunday: maydonda kim kuchli bo'lsa o'sha o'ynasin, uning millati, dini boshqa bo'lishi mumkin, lekin maydonda borini bersin.
Futzal chempionatida VAR tizimi bo'ladi. Lekin bu katta ehtimol ikkinchi davradan yo'lga qo'yiladi.
Ertaga 10 nafar jahon yulduzi va ular bilan birga 15 nafar xodim kelmoqda. Ertalab 7:50 da ular aeroportga kelib qo'nishadi".