"Bavariya"ga Germaniya termasi qahramoni kerak

"Bavariya" rahbariyati Bremenning "Verder" klubi va Germaniya terma jamoasi hujumchisi Niklas Fyullkrugni sotib olish imkoniyatini ko'rib chiqmoqda.

29 yoshli futbolchi joriy mavsum Bundesligada yorqin o'yin ko'rsatmoqda. Forvard "Verder" tarkibida allaqachon 10 ta gol urishga ulgurdi.

Fyullkrug bir necha kun oldin Jahon chempionatida Ispaniyaga qarshi o'yindagi goli evaziga butun futbol olamiga tanildi. 

"Sportbuzzer" portalining yozishicha, hujumchiga "Bavariya" jiddiy qiziqish bildirmoqda. OAVga ko'ra, uning transfer narxi ham u qadar qimmat emas. 

Qayd etilishicha, "Verder" og'ir moliyaviy ahvolda. Klub futbolchini hatto 10 million evrodan kamiga sotishga ham rozi bo'ladi.