Bahodir Nasimov: “Katta ehtimol bilan Qatarga ketaman"

Yangi mavsumning o'zidayoq Qatar yulduzlar ligasida Rashidovdan tashqari yana boshqa hamyurtimiz ham paydo bo'lishi kutilmoqda. Gap Bahodir Nasimov haqida ketmoqda. O'zbekiston milliy terma jamoasi azosi hisoblangan ushbu hujumchi bunga qadar Eron Pro ligasida “Padideh” jamoasi sharafini himoya qilib kelayotgandi. Mavsum yakuniga etgach futbolchimizning eronliklar bilan tuzgan shartnomasi tugagandi. Natijada unga Qatarning “Al Garafa” jamoasi qiziqish bilan qaray boshladi. SHuningdek, ushbu mamlakatning yana bir klubi ham Nasimovni o'z safida ko'rishni istamoqda. Bahodir bilan bog'langanimizda esa shunday dedi:

-  CHindan ham menga Qatar jamoalaridan yaxshi takliflar bor. Bu bilan agentim jiddiy shug'ullanyapti. Bugun yoki ertaga rasmiy taklif yuborishi kutilyapti. Ular menga tayyor shartnomani yuborishmoqchi. Nazarimda, shu kunlarda hammasi hal bo'ladi”.

Voqealar rivoji tezlashayotgani ko'rinib turibdi. Aftidan u “Padideh” jamoasi bilan xayrlashgan ko'rinadi. Ammo ular ham futbolchimiz bilan hamkorlikni yana davom ettirish niyatida edilar. Lekin unga yanada qiziqarli takliflar kelib tushmoqda. Albatta, Nasimov Eron chempionatida yomon taassurot qoldirgani yo'q. SHu bois ham hujumchimizga bo'lgan qiziqish ortib boryapti. Unga taklif bilan chiqayotgan jamoalar esa sizga ham qiziq tuyulayotgandir. Bu xususida Nasimovga murojaat qilganimizda undan quyidagi javobni oldik:  

- Men uchun eng yaxshi variant sifatida qatarliklarni aytgan bo'lardim. Muzokaralardan shu narsa malum bo'lyaptiki, ko'proq Qatarga ketishim oydinlashib boryapti. SHuningdek, Ozarbayjon va Qozog'istondan ham takliflar bor. Darvoqe, o'zimizni oliy ligadan ham chaqiruvlar bo'lyapti. Lekin Qatarga ketishim 99 foizga hal bo'lib qoldi desam ham yanglishmasam kerak. Agentimning yakuniy javobini kutib o'tiribman. “Al Garafa” ham men bilan jiddiy qiziqyapti. SHuningdek, yana bir jamoasi ham aloqaga chiqqan, dedi – Bahodir.

SHuni aytish kerakki, qatarliklar futbolchimizning o'yinini ancha paytdan beri kuzatib kelishayotgandi. O'z navbatida Bahodirga ham Qatar chempionati juda qiziq bo'lib ko'rinmoqda. Albatta, hali yakuniy qarorga kelingani yo'q. SHunga qaramasdan, muzokaralarning oxiri ijobiy ko'rinish olishi kutilmoqda. Nasimovning o'zi ham tez orada Qatarga yo'l olishga tayyorgarlik ko'ryapti. Demak, voqealar rivojini kuzatishda davom etamiz.

FIRDAVSXON