Azizjon G'aniev: "Superkubokdagi g'alabani ota-onamga bag'ishlayman"

Ushbu o'yindan keyin "SHabab Al Ahli" yarim himoyachisi o'zbekistonlik Azizjon G'anievning fikrlari bilan qiziqdik.

- Azizjon Superkubokdagi g'alaba muborak bo'lsin! O'yin qanday o'tdi?
- Tabrik uchun rahmat. Meni quvvatlab turgan barcha muxlislarga ham minnatdorchilik bildirmoqchiman, barchaga rahmat. "SHarja"ga qarshi qiziqarli o'yin bo'ldi. Ikkala jamoa ham g'olib bo'lish uchun oxirigacha kurashdi. So'nggi daqiqalarda gol urib g'alaba qozondik, jamoamga foydam tekkanidan xursandman.

- Raqib safida o'zbekistonlik Otabek SHukurov o'ynadi...
- Otabek SHukurov bilan uchrashuvdan oldin gaplashdik, bir-birimizga omad tiladik. O'yindan keyin Otabek aka yonimga kelib g'alaba bilan tabrikladilar, men uchun xursand ekanliklarini aytdilar. Ularga keyingi o'yinlarda omad yor bo'lishini tiladim.

- Kechagi g'alabani kimga bag'ishlaysiz?
- Ushbu g'alabani uyda duo qilib turgan ota-onamga bag'ishlayman. SHu darajaga etishimda ular juda ham katta hissa qo'shishgan.

- So'nggi savol Dostonbek Hamdamov BAA chempionatiga ko'chib o'tdi. Dastlabki o'yin aynan siz o'ynayotgan "SHabab Al Ahli"ga qarshi o'tdi...
- "Al Nasr" bilan shartnoma tuzgan Doston aka uchun juda ham xursand bo'ldim. Birinchi o'yin doim og'ir bo'ladi, ayniqsa begona chempionatda. Xudo xohlasa o'zlarining eng yaxshi o'yinlari bilan barchani xursand qiladilar.

Narzulla suhbatlashdi