Azamat Abduraimov: "Klub uchun jonini beradigan o'yinchilarni taklif etishni rejalashtirayapmiz"

- Albatta bugungi o'yindagi hisobdan qoniqmadim. CHunki biz tengma-teng o'yinda mag'lubiyatga uchradik, - deb gap boshladi Azamat Abduraimov. 

- SHogirdlarim yuzaga kelgan qulay imkoniyatlardan foydalana olishmadi. "Nasaf"dek kuchli jamoa bilan jamoam tengma-teng kurash olib borgani meni judayam quvontirdi. Jamoam bugungi bahsda yomon o'ynadi deb ayta olmayman. Men shogirdlarimga bugungi o'yin uchun minnatdorchilik bildiraman. Bugun bizga biroz omad etishmadi. "Nasaf" yaxshi shakllangan jamoalardan biri. Har qanday holatda ham ularni bugungi g'alaba bilan tabriklayman.

- Jamoani og'ir ahvoldan olib chiqib ketishimga ishonaman. Agar ishonmaganimda oldinroq istefoga chiqish uchun arizamni yozgan bo'lardim. Bugun shogirdlarim chiroyli o'yin namoyish etishdi. To'g'ri biz judayam og'ir ahvoldamiz. Birinchi davra tugashiga yana 4 tur bor. SHu o'yinlardan keyin kerakli xulosalarni chiqaramiz. Davralar oralig'ida jamoamizda katta o'zgarishlarni amalga oshiramiz. Klub uchun jonini beradigan o'yinchilarni taklif etishni rejalashtirib turibmiz. 1-davradan keyin jamoamdagi xohish bilan o'ynamayotgan o'yinchilar bilan xayrlashamiz.

- "Andijon"ning shu kungacha ko'rsatayotgan natijalari qoniqarsiz albatta. Bunga birinchi navbatda bosh murabbiy aybdor bo'ladi. SHuning uchun barcha aybni o'z bo'ynimga olaman. Bizda yaxshi jamoa tashkil etilgan. Bu jamoani parchalanib ketishini xohlamayman. Yuqorilarga ko'tarilishini siz-u biz ko'rishni istaymiz. Menga berilayotgan imkoniyatlardan foydalanishga harakat qilyapman. "Andijon" muxlislariga gap yo'q. Ular qo'llaridan kelganicha jamoani qo'llab-quvvatlashib kelishmoqda. Buning uchun Nodirbek To'ychievga rahmat. Biz muhlislarni ishonchini qozonishga harakat qilamiz.

Komiljon Ikromov.