Axbor Imomxo'jaev xotira turniriga 5 iyul kuni qura tashlanadi

Jamoalar musobaqa nizomi asosida o'z tarkiblarini shakllantirmoqda. Rejaga ko'ra, 6 iyul kuni O'zbekistonda barcha klublar tanaffusga chiqadi hamda 7 iyul sanasidan etiboran turnir start oladi. 

5 iyul kuni soat 16:00 da "Bunyodkor" stadionida musobaqaga qura tashlab beriladi. Turnir o'tgan yili bo'lgani kabi "Bunyodkor" akademiyasi futbol maydonlarida o'tkaziladi. 

Nizomga ko'ra, qura oldidan jamoalar savatlarga ajratilmaydi. 10 ta jamoa bir savatdan joy oladi hamda berger tizimida qura o'tkaziladi. Yakunda uning dastlabki uch tur o'yinlari qoldirilib, qolganlari o'chirib yuboriladi. Yani, musobaqaning so'nggi — to'rtinchi kuniga qadar barcha jamoa 3 tadan o'yinda maydonga tushadi va shu asosda turnir jadvali shakllanadi. 

To'rtinchi kuni turnir jadvalida dastlabki ikki o'rinni egallagan jamoalar final o'yini orqali musobaqa g'olibini aniqlab beradi. Xuddi shu tartibda 3, 5, 7 va 9-o'rinlar uchun ham bellashuvlar o'tkaziladi. Festival shaklida o'tadigan turnirda barcha ishtirokchi jamoa umumiy hisobda 4 tadan uchrashuv o'tkazishi taminlanadi. 

Qiziq tarafi shundaki, dastlabki uch tur davomida asosiy vaqtda g'olib chiqqan jamoaga 3 ochko beriladi. O'yin durang bilan yakuniga etsa, penaltilar seriyasi o'tkaziladi. Bunda g'olib jamoa 2, mag'lub esa 1 ochko egasiga aylanadi. Asosiy vaqtdayoq mag'lub bo'lgan tomon tabiiyki, ochkosiz qoladi.