Avstraliya bosh murabbiyi: "Biz yana muxlislarga quvonch ulashishni xohlaymiz"

JCH-2018 yo'lida kurash olib borayotgan Avstraliya va Suriya milliy terma jamoalari ertaga pley-off javob bahsida maydonga tushishadi. Xabaringiz bor, Malayziyada bo'lib o'tgan birinchi o'yinda 1:1 hisobi qayd etilgandi. Ertangi o'yin Toshkent vaqti bilan 14:00da start oladi. 

Avstraliya terma jamoasi bosh murabbiyi Ange Postekoglu "sokkeruzlar" Suriyaga qarshi javob bahsida g'alaba qozonishiga ishonmoqda. Ertangi bellashuv Sidneydagi eng katta stadionda bo'lib o'tadi. Bu stadionda Avstraliya 2015 yil Osiyo Kubogi finalida o'ynab, Janubiy Koreyani 2:1 hisobida mag'lub etgan va bosh sovrinni qo'lga kiritgan. 

Murabbiyning ertangi o'yin oldidan fikrlari quyidagicha bo'ldi: 

"Bu stadion bilan bog'liq bizda ajoyib xotiralar saqlanib qolgan", - deydi Avstraliya termasi ustozi Ange Postekoglu. - Hozirgi tarkibning 80 foizi chetda o'ynamoqda, bu stadionga kelganda hamma maza qilib to'p tepgisi keladi". 

"Jamoa bo'lajak uchrashuvga tayyor. Biz Suriyani mag'lub etib muxlislarga quvonch ulashishni xohlaymiz. Futbolchilar terma jamoada o'ynash faqat o'zlari uchun emas, balki oilalari, qarindoshlari va Vatan uchunligini juda yaxshi bilishadi".