"Arda Turan bilan suhbat, Rayan Babel, "Bunyodkor" va qaysi raqamni tanlagani" - Jahongir O'rozovning "Eyupspor"ga o'tganidan keyingi ilk intervyusi

"Bunyodkor"ning 20 yoshli himoyachisi Jahongir O'rozov Turkiya Birinchi ligasi vakili, Arda Turan murabbiylik qilayotgan "Eyupspor" klubi bilan shartnoma imzoladi. Futbolchi saytimizga yangi jamoasiga o'tganidan keyin ilk bor intervyu berdi. 

-  "Bunyodkor" bilan xayrlashish qanday bo'ldi? Jamoani qanday taassurotlar bilan tark etdingiz? 

- "Bunyodkor" — ahil jamoa. Bu klubda o'tkazgan har bir kunim yodda qolarli bo'ldi. Mehnat qilayotgan barchaga rahmat aytaman. Jamoaga har bir uchrashuvda omad tilayman. "Bunyodkor" har doim qalbimda qoladi. Jamoani unutmayman. 

- Yozda sizga xorijdan takliflar ko'paydi. Bunda Osiyo chempionati va Jahon chempionatining ham effekti bo'ldimi?

- To'g'ri, yozda ko'plab jamoalardan takliflar bo'ldi. Lekin menga Turkiya klubidan tushgan chorlov maqul keldi. Sababi jamoa oldiga yuqori ligaga chiqish vazifasi qo'yilgan. Jamoada ko'plab jahon yulduzlari to'p tepadi. Jamoani ertasi borligi "Eyupspor"ni tanlashimga turtki bo'ldi. Osiyo va Jahon chempionati bu borada xorij chempionatiga chipta vazifasini o'tadi. 

- Turkiya Evropa sari tashlangan ilk qadammi? Umuman "Eyupspor" haqidagi ilk fikrlaringizni aytib bersangiz. 

- Albatta. Maqsadim — Evropada to'p tepish. Klubda barcha sharoitlar yaratilgan, bu meni qoniqtirdi. Hammasi professional tarzda tashkil etilgan. Arda Turan tezda jamoaga moslashib, himoyada yordam berishimni aytmoqda. 

- "Atletiko" va "Barselona" sobiq futbolchisi bilan ilk suhbatda nimalar muhokama qilindi? 

- Suhbatimiz uzoq kechmadi. Professional murabbiy ekanligi sezilib turibdi. Jamoaga qo'shilganimdan xursandligini yashirmadi. 

- Qaysi raqamni tanladingiz? 

- 44-raqamni tanladim. 

- Bunda qandaydir ramziy mano yashiringanmi? 

- Raqam tanlab o'ynaydigan futbolchi emasman. Buning hech qanday manosi yo'q. 

- Jamoada taniqli niderlandiyalik futbolchi Rayan Babel o'ynaydi. U jamoada qaysi sifatlari bilan ajralib turadi? 

- Babel o'z ishining ustasi. Inson sifatida yoshlarga o'rnak bo'lishi mumkin. Xulq-atvori yaxshi ekanligini payqash qiyin emas. 

- Qaysi himoyachilarga havas qilasiz? 

- O'zbekistonda Anzur Ismoilovning o'yinlari maqul keladi. Evropada — Jorjio Kellini. 

- "Bunyodkor"ning muvaffaqiyat qozonishiga nima etishmayapti? Klub o'rtamiyonalar safiga qo'shilib qolgani nima sababdan deb o'ylaysiz? 

- Har bir klubda o'sish va pasayish bo'ladi. Bu futbolning yozilmagan qonuni. 

Abdulaziz Iskandarov suhbatlashdi