Anvar Soliev: “Butsani mixga ilish vaqti keldi”

Ular orasida Anvar Soliev, Baxtiyor Qambaraliev, Botir Qoraev, Asror Aliqulov kabi ko'zga ko'ringan futbolchilar ham bor edi. “S” guvohnomasi murabbiylikdagi ilk pog'ona bo'lib, uni qo'lga kiritmay turib, “B”, “A” va keyinchalik PRO licenziyalariga o'qib bo'lmaydi. O'quv kurslariga odatdagidek OFK instruktori Islom Ahmedov rahbarlik qildi. Mashg'ulotlar kuniga ikki mahaldan olib borildi. Bo'lajak murabbiylar ham nazariy, ham amaliy mashg'ulotlarda qatnashishdi. Biz ushbu o'quv kursining so'nggi kuni ishtirokchilardan intervyu oldik. Dastlab, “Paxtakor” hujumchisi, o'ziga xos rekordlar sohibi Anvar Solievning fikrlari bilan qiziqdik.

- Anvar aka, o'quv kurslari qanday o'tdi? O'quv jarayoni maqul keldimi?
- Albatta, o'quv kurslari nafaqat menga, balki boshqa ishtirokchilarga ham birdek maqul keldi. Juda ham qiziqarli jarayon ekan. Nazariy darslarda olgan saboqlarimizni amaliy mashg'ulotlarda yanada mustahkamladik. O'quv-mashg'ulot jarayoni yangicha uslubda tashkil etildi. O'yin epizodlarini tahlil qildik. Endi bu murabbiylikning ilk pog'onasi bo'lgani uchun yo'riqchilarga savollarimiz ko'p bo'ldi. Mana sekin-asta murabbiylik faoliyatimiz ham boshlanyapti. Yillar juda tez o'tib ketdi. Kuni kecha futboldagi ilk qadamlarimiz qo'yilgandi. Mana bugun faoliyatni yakunlash arafasida turibmiz.

- Murabbiylik kasbi qiyin ekanmi?
- Har holda men o'ylaganchalik oson emas ekan. Maydondagi futbolchilarga, qolaversa, natijaga javobgar shaxs bo'lasiz. Faoliyatim davomida ko'plab tajribali murabbiylar qo'l ostida o'ynadim. Ulardan o'zim uchun ko'p narsa olganman. O'ylaymanki, bir kun kelib murabbiylik faoliyatim boshlanganida bu o'rganganlarim as qotadi.

- Futbolchilik faoliyatini yakunlash haqida o'ylamayapsiz?
- Bilasizmi, uch yildan beri shu haqida o'ylayman. Lekin har safar chempionat boshlanishiga sanoqli kunlar qolganida klublar takliflar bo'ladi. Futbolni azbaroyi yaxshi ko'rganimdan futbolchilik faoliyatimni yakunlashga botina olmayman.

- Yangi mavsumda ham shunday bo'ladimi?
- Yo'q, menimcha bunday bo'lmasa kerak (kuladi).

- Balki, bu yil “Paxtakor” bilan yana bir bor chempionlik shoxsupasiga ko'tarilib, keyin faoliyatingizni yakunlarsiz?
- O'zim ham shu haqida o'ylab turibman. Katta ehtimol bilan, bu yil professional futbolchilik faoliyatimdagi so'nggi mavsum bo'ladi. CHempionat yakunlanishi bilan butsalarimni mixga ilaman. Lekin faxriylar uchun futbol o'ynashda davom etaman.

- CHempionlik uchun yaxshigina imkoniyat yuzaga kelgandi. Lekin “Lokomotiv”ni ancha yaqinlashtirib oldinglar.
- Futbol shunisi bilan ham qiziq. Oldinda bizni juda ham qiziqarli o'yinlar kutib turibdi. “Nasaf”ga qarshi o'tkaziladigan o'yin ko'p narsani hal qiladi. Keyin autsayderlar bilan bo'lib o'tadigan uchrashuvlar ham oson kechmaydi. Oliy ligada o'z o'rnini saqlab qolish uchun kurashayotgan jamoalardan har qanday “syurpriz”ni kutish mumkin. SHunday bo'lsada, chempionlik masalasi o'z qo'limizda. Qolgan o'yinlarga bor kuchimizni sarflab, yakunda chempionlik unvonini o'zimizda saqlab qolish uchun astoydil harakat qilamiz.

Kamoliddin ALIMOV suhbatlashdi