“Andijon” yig'inni CHirchiqda o'tkazadi

“Burgutlar” 9 iyul kunidan davralar oralig'idagi o'quv-yig'in mashg'ulotiga kirishadi. Yig'in o'tkazish uchun CHirchiq shahridagi so'lim go'shalardan biri tanlangan. Murabbiylar shtabining rejasiga ko'ra, CHirchiqda ikki mahal mashg'ulot o'tkazish bilan birga, ayrim jamoalar bilan sinov-nazorat uchrashuvini ham tashkil etish rejalashtirilgan. Hozircha sparring-raqiblarning ikkitasi malum bo'lib, dastlab Toshkent viloyatining “Nurafshon” jamoasi, keyinchalik qo'shni Tojikiston respublikasining “Xo'jand” klubi bilan kuch sinashadi. Malumki, “Nurafshon” jamoasi PRO-Liganing “B” guruhida karvonboshchilik qilib kelayotgan bo'lsa, “Xo'jand” OFK Kubogi ishtirokchisi hisoblanadi.

Albatta bu yil o'z oldiga Superligaga chiqish vazifasini qo'ygan va bu yo'lda astoydil kurashayotgan “Andijon” tarkibida transfer chog'ida ayrim o'zgarishlar bo'lishi kutilmoqda. Har bir poziciyadagi raqobatni kuchaytirish maqsadida hozirda bir qator futbolchilar bilan muzokara olib borilmoqda. Nomlarni hozircha oshkor eta olmasakda, ularning deyarli barchasi Superliga klublaridan kelayotganini aytish mumkin. Agarda ushbu futbolchilar bilan rasmiy kelishuvga erishilsa, shundagina nomlar elon qilinadi.

Mavsumning birinchi qismini “Andijon”da o'tkazgan, Xusan Olimjonov, Mirjalol Rajabov, Hoshimbek SHokirov, Maruf Zokirjonov, Bekzod G'anijonov hamda Obid Hakimov singari futbolchilar bilan tuzilgan shartnoma har ikki tomonning o'zaro kelishuviga binoan bekor qilindi va ular bilan do'stona ravishda xayrlashildi. O'z navbatida malum muddat “burgutlar” sharafini himoya qilgan yuqoridagi futbolchilarning keyingi faoliyatiga omad tilaymiz.

Yana shuni ham qo'shimcha qilish lozimki, “Andijon” tajribali yarim himoyachi Eldor Boymatovni transferga qo'ydi. Ayni damda markaziy yarim himoyachi Superliga vakili “Qizilqum” yig'inida ishtirok etmoqda. Agarda tomonlar futbolchining transfer masalasida bir to'xtamga kelsa, u xolda futbolchi mavsumning qolgan qismini “Qizilqum”da o'tkazadi. Aks xolda, Boymatov boshqa klubga transfer qilinishi mumkin. Ayni damda Eldorga bir nechta jamoalardan qiziqish bor.