Andijon rossiyalik murabbiy bilan kelishuvga erishdi

Xabaringiz bor, Superliganing 3-turidan so'ng «Andijon» bosh murabbiyi o'z arizasiga binoan istefoga chiqqandi. Garchi jamoa natijasi ijobiy kechmayotgan bo'lsada, ko'pchilikka Aleksandr Xomyakovning faoliyati maqul kelayotgandi. Biroq rossiyalik mutaxassis shunga qaramay, klubni tark etishga qaror qildi. Bunga aynan nima sabab bo'lganini murabbiy to'liq izohlab bermasdan, shunchaki jamoada natija bo'lmagani bilan izohlab qo'ya qoldi.

«Burgutlar» rahbariyati bo'shab qolgan o'ringa bir nechta nomzodlarni ko'rib chiqdi. Yakunda ular Viktor Kumikov variantida to'xtaldi. Rossiyalik taniqli mutaxassis yurtimizda karantin davri boshlanishidan avval O'zbekistonga tashrif buyurgandi. Malumotlarga ko'ra, Viktor Balyutovich dastlab Navoiyda bo'lib, «Qizilqum» rahbarlari bilan uchrashgan. Aftidan muzokara jarayoni ikkala tomonni birdek qoniqtirmagan ko'rinadi.

Deyarli ikki oydan buyon Yangier shahridagi futbol qarorgohida istiqomat qilib kelayotgan Viktor Kumikov yaqinda o'ziga yangi jamoa topdi.

Deyarli har mavsum bosh murabbiyini almashtirib kelayotgan «Andijon» jamoasi rahbariyati endi boshqa bir rossiyalik mutaxassis bilan hamkorlik qilishga og'zaki kelishib oldi.

Ishqibozlarga yaxshi malumki, Kumikov ilgari yurtimizda «Mashal», «Nasaf» hamda «Olmaliq» jamoalarini boshqargan. Uning faqat vohadagi faoliyati ijobiy taassurot qoldirgan deya olamiz. Karantin davri rasman to'liq yakuniga etgach, Viktor Balyutovich va «Andijon» jamoasi o'rtasida rasmiy bitim imzolanib, bosh murabbiyi sifatida keng ommaga tanishtiriladi hamda mutaxassis jamoada faoliyatini boshlaydi.

Katta ehtimol bilan «Andijon»ning o'quv-yig'in mashg'ulotlari Yangier shahridagi maxsus futbol qarorgohida olib boriladi.