Ana xolos, "Dinamo" o'nta o'yindan beri gol ura olmayapti

SHunday qilib "Dinamo"ning ketma-ket o'yinlardagi golsiz seriyasi 10ta uchrashuvga etdi. Bu jamoa oxirgi marta birinchi davraning 13-turida "Neftchi"ni 3:2 hisobida mag'lub etib qaytgandi. SHundan beri "Dinamo" qatorasiga 10ta o'yinda raqiblar darvozasiga to'p kirita olmadi, tabiiyki gol bo'lmaganidan keyin g'alaba ham bo'lmaydi. 

Qizig'i shundaki, "Dinamo" ishtirokidagi o'nta o'yindan beshtasi 0:0 hisobida yakun topgan. Qolaversa, jamoa "Navbahor"ga 0:1, "Lokomotiv" va "Bunyodkor"ga 0:2 hamda "Metallurg"ga 0:3 hisobida imkoniyatni boy berdi. 

Umumiy hisobda samarqandliklar bu yilgi chempionatda 18ta gol urib, o'z darvozalaridan 25ta to'p o'tkazib yuborishgan. "Dinamo" hozirgacha uyda va safardagi bellashuvlarda bir xil 9tadan gol urgan. Eslatib o'tamiz, bu jamoa joriy mavsumni ketma-ket uchta g'alaba bilan boshlagandi.