Aleksey Evstafeev: "Qisqa vaqt ichida ruhiy tomonlama yigitlar bilan ish olib bordik va bu natija berdi"

"Ilk navbatda, g'alaba bilan yigitlarni, jamoadagilarni tabriklayman. Borlarini berishgani uchun rahmat aytaman. O'yingacha bo'lgan vaqtda biroz ish olib borganimizga qaramay, futbolchilar ko'rsatmalarni to'g'ri tushunishdi. Bu birinchi qadam sanaladi. Yanada oldinga intilishimiz, ishlashimiz kerak. Raqibga ham chiroyli o'yin uchun rahmat aytishni istardim. Tarkibda salohiyatli futbolchilar bor, ular terma jamoaning o'zagini tashkil qiladi", - deydi Aleksey Evstafeev. 

- Odatda yangi murabbiylar qisqa vaqtda ko'p narsani o'zgartirishmaydi. Sizda tayyorgarlik uchun vaqt kam bo'ldi. Qaysi kamchiliklarni bartaraf etishga ulgurdingiz?

- Ha, qisqa fursatda katta o'zgarish qilish qiyin. O'yingacha ko'proq ruhiy tomonlama ishladik. Yigitlarga o'tgan mag'lubiyatlarni unutishni, oldinga intilish kerakligini taqidladik. Ko'rganingizdek bu natija berdi va bugun ilk g'alabani qo'lga kiritdik. 

- "Aral" bilan o'yindagi kabi bugun ham jamoa birinchi bo'limdan so'ng ortda ko'proq o'ynadi. Lekin xarakter ko'rsatib g'alaba golini urdi...

- Balki charchoq bilan bog'liqdir. Aavvalgi o'yinlar haqida nimadir deya olmayman. CHempionat davomida bu ustida ishlaymiz. "Do'stlik" tarkibida yosh va salohiyatli futbolchilar jamlangan. Faqat mahorat va tajriba kam. Oldinga qarab rivojlanishda davom etamiz.