Abduqahhor Marufaliev: “Boshlang'ich tarkibda Nasimovga ishonch bildirilsa kerak”

Aytish kerakki, Marufalievga ham futbolchilarning orzusi bo'lmish, milliy terma jamoa libosini kiyish nasib qilgan. 1992 yildan 2001 yilga qadar milliy terma jamoa murabbiylari etiborida turgan Abduqahhor Marufaliev bosh jamoamiz safida 32ta uchrashuvda ishtirok etib, raqiblar darvozasiga 5 bor yo'l topa olgani bilan tarix zarvaraqlaridan joy egalladi. SHu bois Iordaniya bilan o'yin oldi navbatdagi suhbatdoshimiz, Marufaliev bo'ldi.

“Avvalo milliy terma jamoamizga safardagi o'yinda omad tilayman. Tabiiyki men ham xalqimiz orziqib kutayotgan g'alabani kutyapman. O'ylaymanki yigitlarimiz bunga qodir. Bugun Sport TVda o'yinni 21:00da olib ko'rsatilishi to'g'risida reklama qilinyapti. SHu bois uchrashuvni oynai jahon orqali ko'rib bo'lsada, futbolchilarimizni qo'llab quvvatlaymiz”.

“Fikrimcha Ammanda kechadigan bahsda 1:1 hisobi qayd etilsa kerak. Safarda gol urishimiz juda ahamiyatli. G'alabami yoki durang natijami, muhimi safardan qoniqarli natija bilan qaytishdir”.

“Bugungi o'yinda murabbiylar shtabi hujum chizig'iga boshlang'ich tarkibda Bahodir Nasimovni qo'ysa kerak. CHunki o'zingizga yaxshi malumki, Nasimov oxirgi marta Toshkentda o'tgan o'yinda zaxiradan tushgan bo'lishiga qaramay, gol urishni uddalagandi. Baqoev ham chakki emas. Unda ham imkoniyat yaxshi. Menimcha Ulug'bekni ikkinchi taymda o'yinni yanada kuchaytirish uchun tushirsa kerak. Bunga o'yin davomida guvoh bo'lamiz”.


Islombek Rustambekov suhbatlashdi