O'FA Lopes variantigacha ispaniyalik Xose Mariya Mendes va boshqa xorijlik murabbiylar nomzodini ham ko'rib chiqqan. Saytimiz jurnalisti Abdulaziz Iskandarov o'z vaqtida terma jamoamizni ilk bor mundialga olib chiqqan Xose Mariya Mendes bilan bog'landi va ayrim mavzularda suhbatlashdi.

- O'zbekistondagi faoliyatingizdan so'ng Tailand, Portugaliya kabi davlatlarda ishladingiz. Aytingchi, bugungi kunda nimalar bilan bandsiz?

- O'tgan yilning aprel oyidan boshlab Xitoydagi faoliyatim boshlandi. Hozirda "Shenzen Nanling" jamoasida faoliyat olib bormoqdaman. Bu mavsum jamoa bilan chempionlikni qo'lga kiritdik. Oldinlari bu mamlakatga sayohat uchun kelganimda qiynalgan edim. Xitoyda ishlash men uchun yangi tajriba va sarguzashtdir. Hozirda Xitoyda baxtliman.

- O'zbek futzalidagi bugungi o'zgarishlar, yangiliklar bilan qiziqib turasizmi?

- O'zbekistondagi yangiliklarni kuzatib boraman. U erda ko'plab do'stlarim bor. Bir nechta futzalchilar bilan hamon aloqadaman. Jahongir Usmonov bilan ham tez-tez gaplashib turamiz. Umuman olganda O'zbekistondan yaxshi xotiralar qolgan. Mamlakatingizdagi futzalga oid barcha yangiliklar etiborimda turadi.

- Futzal terma jamoamiz murabbiyligiga nomzodlar orasida siz ham bor edingiz. Taklif rostdan ham bo'lganmidi va qabul qilishingizga nima to'sqinlik qildi?

- Menga Jahongir Usmonov qo'ng'iroq qildi va qaytish taklifini bildirdi. U insonni juda hurmat qilaman. Lekin buning iloji yo'q, klub bilan shartnomam bor edi. Xose Venansio Lopes Jahonning eng kuchli murabbiyi. Uning ishiga va darajasi yuqori ekanligiga ishonaman. O'zbekistonga top saviyadagi murabbiy keldi.

- 2024 yilgi Jahon chempionati O'zbekistonga berildi. Mezbon faktoridan kelib chiqib musobaqada O'zbekistondan qanday natija kutyapsiz?

- O'z uyidagi katta musobaqada qatnashish qo'shimcha masuliyat hisoblanadi. O'zbekiston terma jamoasi muxlislar qo'llab-quvvatlashi tufayli katta natija qayd etishiga ishonmoqdaman. Bu qiyin tuyulishi mumkin. Lekin ilojsiz narsa emas. Avvalo birinchi maqsad guruhdan chiqish masalasini hal qilishdan iborat. O'tgan Jahon chempionatida O'zbekiston dunyoning eng kuchli 16ta jamoasi qatoriga kirdi va bu yaxshi natija sifatida qabul qilindi. Endilikda bu natijani takrorlab, kuchli 8talikka kirishga harakat qilish kerak. Men bunga ishonaman. Agar O'zbekiston chorak finalgacha etib bora olsa, aqlbovar natija hisoblanadi.

- Jahon chempionatida etakchilar o'zgarishi mumkinmi?

- So'nggi yillarda futzal dunyoning barcha nuqtalarida rivojlanmoqda. Bundan avval faqat 3-4 jamoa futzalni boshqarardi. Ispaniya, Braziliya, Portugali va hokazo. So'nggi yillarda Eron, Rossiya, Paragvay, Argentina, Marokash ham qo'shildi. O'zbekiston ham jahonning etakchi futzal terma jamoalari qatoriga kirishga harakat qilishik kerak. Jahon chempionatlarida har bir o'yin qiyin kechadi. Kelayotgan Jahon chempionati futzal tarixidagi eng qiyini bo'ladi.

- Qitada Eron etakchiligini to'xtatish nimalarga bog'liq?

- Eron o'z futzaliga ko'p yillardan beri etibor berib keladi va rivojlantiradi. Eron aholisini hayoti futzalga bog'langan. Ular bolaligidan futzal o'ynaydi. Futzal ligalari juda ko'p. Odamlar ham qiziqadi. Eron uchun futzal bilan shug'ullanish odatiy hol. Eronni bitta o'yinda yutish mumkin. Lekin bunday natija hech kimga kerakmas. Bu doimiy bo'lishi lozim. Xose Venansio Lopes Eronni yuta oladigan mutaxassis. Tajribasi katta. Har doim oldiga qo'ygan maqsadlarni bajarishga odatlangan.

Xose Mariya Mendes: "O'zbekiston futzal terma jamoasiga Jahonning eng kuchli murabbiyi kelgan"