"Maykl Kerrikning "Manchester Yunayted" bosh murabbiyi etib tayinlangani borasidagi qaror menga yoqdi. U ish boshlaganidan beri jamoada ko'p narsani o'zgartirishga muvaffaq bo'ldi. Shuningdek, unda ishlaydigan o'z uslubi borligi ko'rinib turibdi. Futbolchilar ham unga ijobiy munosabatda - buni jamoaning o'yinidan ko'rish mumkin. Shuning uchun Kerrikka bu lavozimni ishonib topshirish ajoyib qaror deb hisoblayman.
Hamma narsa Ole-Gunnar Sulsher davridagi kabi tugaydi, chunki u ham vaqtinchalik murabbiy sifatida boshlagan, degan gaplar mutlaqo ortiqcha. Kerrik bunday imkoniyatga loyiq va unga albatta imkon berish kerak.
Maykl Kerrikning "Manchester Yunayted"dagi yo'liga nazar solsak, Pep Gvardiolaning "Barselona"da katta imkoniyatga ega bo'lgan davri yodimga tushadi. Kerrikka qarab, Gvardiolaning o'sha paytdagi darajasini ko'raman. Axir Pep ham deyarli kutilmagan joydan chiqqan va ulkan muvaffaqiyatlarga erishgan edi.
Kerrik ham shunday yo'lni bosib o'ta olmaydi deb kim aytishi mumkin? Unda "Midlsbro"da ishlash tajribasi bor. Unga ishonish kerak. Hozirgacha u o'z vazifasini a'lo darajada bajardi. Qanday qilib unga ishni davom ettirish va "Manchester Yunayted"ni yangi bosqichga olib chiqish imkoniyatini bermaslik mumkin?
U "Manchester Yunayted" nimani anglatishini yaxshi biladi va klubni yana avvalgi yuksak cho'qqilarga qaytarish uchun nima qilish kerakligini tushunadi", - dedi Sheringem.
