Joriy yilgi mavsum, harqalay, avvalgilariga nisbatan shiddatli va qiziqarli kurashlarga boy bo'lmoqda. Poytaxt klublarining g'alabalariga ko'nikib qolgan bir paytda boshqa jamoalar ham ularga etarlicha boshog'riq bo'lmoqda. Klublarimizning xalqaro maydonlardagi ishtiroki ham hozircha yomon emas. Xo'sh, qo'shni mamlakatlarning chempionatlari qay tarzda bo'lib o'tmoqda? Keling, nazar tashlaymiz.

Qozog'iston chempionati

Qozog'iston chempionatida ham bizdagi sinagari 14 ta klub ishtirok etadi. Mamlakat chempioni Yevropa Chempionlar ligasi saralash bosqichida ishtirok etsa, bizdagi ma'lumotlarga ko'ra, Yevropa Konferencyalar ligasi saralash bosqichida 3 ta klub qatnashadi. Amaldagi chempion "Tobol" klubi sanaladi. Ushbu klubda O'zbekiston terma jamoasi hujumchisi Igor Sergeev to'p tepadi. Jamoa YCHLning 1-saralash bosqichidan ishtirokini boshlaydi. Ayni paytda 16-turdan so'ng turnir jadvalida "Aktobe" klubi peshqadamlik qilmoqda. "Tobol" esa bir ochko ortda qolgan holda ikkinchi o'rinda bormoqda.

Musobaqa to'purarlari ro'yxatida "Atirau"ning 25 yoshli xorvatiyalik hujumchisi Andriya Filipovich 9 gol bilan yetakchilik qilmoqda. Filipovich 18 yoshida "Yuventus" yoshlari tarkibida ma'lum muddat ijara asosida harakat qilgan, shuningdek, Xorvatiya U-19 jamoasi tarkibida 3ta uchrashuv o'tkazgan. Sergeev esa 6 gol bilan peshqadamlarni taqib qilishda davom etmoqda.

Turkmaniston yuqori ligasi

Turkmaniston yuqori elitasida atigi 8 jamoa ishtirok etadi. Musobaqa g'olibi Osiyo Chempionlar ligasi yo'llanmani qo'lga kiritadi. Ikkinchi o'rin egasi esa OFK kubogi saralash bosqichida ishtirok etadi. "Altin Asir" amaldagi chempion bo'lishiga qaramay, OFK licenziyasini olomagani sababli OFK kubogida ishtirok etdi. Ularning o'rniga vice-chempion "Axal" OCHLning "S" guruhida qatnashib, 4 ochko bilan so'nggi pog'onadan joy oldi. "Altin Asir" klubi futbolchisi o'tgan mavsum yakunlariga ko'ra, 35ta gol bilan chempionat to'purariga aylangan. Ikkinchi o'rindagi futbolchi esa 16 gol urgan. "Altin Asir" klubining "So'g'diyona"ga qarshi o'yinini kuzatgan bo'lsangiz kerak, albatta. Ayni damda ham "Altin Asir" chempionatda 34 ochko bilan peshqadamlik qilmoqda. "Axal" esa ularni quvib o'tishga harakat qilmoqda.

Tojikiston Oliy ligasi

Qo'shni Tojikistonda 10 ta klub chempionlik uchun raqobatlashadi. Peshqadamlikni qo'lga kiritgan jamoa Osiyo Chempionlar ligasiga yo'llanma olsa, yana ikki klub OFK kubogida ishtirok etadi. 10 turdan so'ng "Xatlon" klubi peshqadamlik qilmoqda. "So'g'diyona" bilan OFK kubogida bir guruhdan joy olgan SSKA klubi 3-o'rinda bormoqda. Mamlakatning amaldagi chempioni Dushanbening "Istiqlol" klubi sanaladi, ular ketma-ket 8 mavsumdan beri bosh sovrinni o'ziniki qilmoqda.

Musobaqa to'purarlari ro'yxatida "Esxata" forvardi Dilshod Bozorov oldinda bormoqda, uning hisobida 6 gol mujassam. Uning jamoadoshi, o'zbekistonlik futbolchi Sanjar Rihsiboev hisobida esa 4 ta gol bor. Maumot uchun, chap qanot vingeri bo'lgan 28 yoshli Rihsiboev "Obod", AGMK, "Mashal", "Bunyodkor" klublarida to'p tepgan. Shuningdek, "Dinamo"dagi o'yinlari bilan tanilgan Amirjon Safarov va Superliganing bir necha klublarida (oxirgisi "Turon") o'ynagan Otabek Zokirov ham qo'shni mintaqa chempionatida faol harakat qilmoqda.

Osiyo Chempionlar ligasining joriy mavsumida "Istiqlol" "A" guruhida ishtirok etib, 3 ochko bilan so'nggi pog'anani egallab, musobaqa bilan xayrlashdi.

Qirg'iziston Premer-ligasi

Qirg'iziston chempionatida ham 10 ta jamoa ishtirok etadi, biroq chempion bo'lgan klub Osiyo Chempionatida ishtirok etolmaydi. Turnir g'olibi OFK kubogiga yo'l oladi, yana bir o'rin sohibi esa OFK kubogi saralashida o'z omadini sinab ko'radi. "Dordoy" mamlakatning amaldagi chempioni sanaladi. Biroq joriy yil jamoaning ishlari ko'ngildagidek emas. "Abdish-Ata" ushbu mavsum yetakchilikni qo'lga olgan. 17-tur o'tganiga qaramay, eng ko'p uchrashuv jamoada 14ta bahs mavjud. "So'g'diyona" bilan OFK kubogida bir guruhdan joy olgan "Neftchi" klubi 5-o'rinda bormoqda. To'purarlar ro'yxatida "Alay" hujumchisi Ostrovskiy 5 gol bilan peshqadamlik qilmoqda.

Qo'shni mamlakatlarning chempionatlarida nima gaplar?