Ўтган ёзда терма жамоамиз ЖЧ йўлланмасини қўлга киритди ва барчаси ўзгариб кетди. Футболчилар ва МТЖ жамият орасида энг кўп муҳокама қилинаётган мавзулардан бирига айланди. Терма жамоамизнинг асосий етакчиси Отабек Шукуров ҳам куни кеча шуни таъкидлаб ўтди.
"Ҳозирги кунда барчанинг эътибори бизда", - дея таъкидлаб ўтди Отабек Шукуров.
Терма жамоамиз ЖЧга чиққанидан сўнг ОАВнинг футболга бўлган эътибори ҳам каррасига ошди. Маҳаллий ОАВ кўпроқ футбол ҳақида ёзиб, ёрита бошлади. Бу табиий ҳол. Март ойидаги ФИФА кунлари ҳам истисно эмас. Терма жамоамизнинг машғулотларини ва кунлик ҳаётини ёритиб бораётган ОАВ етарлича. Терма жамоанинг ўйинларини ва машғулотларини ёритиш учун ҳар бир журналист ЎФА томонидан тасдиқланган аккредитацияга эга бўлиши керак. Ушбу жараён мусобақа ёки FIFA кунлари бошланишидан бир неча кун ёки ҳафта аввал бошланади. ЎФА матбуот хизмати бу ҳақда ОАВ вакилларига хабар беради ва ҳар бир нашр ўз мухбирларини рўйхатдан ўтказиш жараёнини бошлайди. Дунёдаги ҳар бир футбол ёки спорт мусобақасини ёритиш аккредитация орқали амалга оширилади. FIFA Series мусобақасига ҳам аккредитацияларни бериш жараёни ҳам бўлиб ўтди. Мени ҳайрон қолдирган жиҳат шундаки, бу сафар ўта кўп "журналист"лар аккредитацияни қўлга киритишди. Ижтимоий тармоқларда блог юритадиган шахслардан бошлаб(айниқса футболга алоқадор бўлмаган контент яратувчилар), шунчаки Элдор Шомуродовга ўхшайдиган бир йигит ҳам ОАВ вакилларига тақдим этиладиган аккредитацияни қўлга киритди. Бу даҳшат! Январь ойида Европага сафар қилдим ва ЕЧЛнинг 7-туридан ўрин олган "Будё Глимт" - "Манчестер Сити" (3:1) ўйинида ишладим. УЕФА аккредитацияга топширган аризани кўриб чиқиши ва аккредитацияни тасдиқлаши учун уч ҳафтадан кўпроқ вақт кетди ва бир неча маротаба турли хил қўшимча ҳужжатларнинг талаб этилди. Вақт ҳам майли, УЕФАнинг медиа вакиллари учун яратилган порталдан рўйхатдан ўтиб, ўз шахсингизни тасдиқлаб олишнинг ўзи бир муаммо. Текширув ўта пухта. Бизда деярли дуч келган инсон аккредитация олиб юрибди.
Бир неча кун аввал Ўзбекистоннинг турли хил ёш тоифаларидаги жамоаларда ва 2017 йилдан буён миллий терма жамоа сафида ҳаракат қилиб келаётган Рустам Ашурматовга ўзингизни таништириб юборинг деб илтимос қилинди. Бугунги машғулотда эса асосий таркибнинг етакчиси футболчиси ҳисобланган ва ЖЧ-2026 3-саралаш босқичидаги жами 10та учрашувнинг барчасида асосий таркибда бошлаб, умумий 900 дақиқа ўйин вақтидан 886 дақиқани майдонда ўтказган Одилжон Ҳамробековга бошқа исм билан мурожаат қилинди. Ҳамробеков ҳам савол берган журналистдан интервью бераётган футболчининг исмини ёдлай олишни илтимос қилди. Бундай хунук ҳолатлардан сўнг футболчиларнинг спорт журналистларига бўлган муносабати ва улар ҳақидаги фикри салбий томонга ўзгариши табиий, афсуски.
Бундай хунук ҳолатларни камайтириш учун ягона ечим - ЎФА ишлаш тизимини кўриб чиқиши. Аккредитацияни кўчадан келган ҳар бир инсонга бераверсак, бундай "қовун"лар сони камаймайди. ЎФА қандай мезонлар орқали аккредитацияларни тасдиқлаганини билмайман, лекин ҳозирги тизим нотўғри ишламоқда. Муаммо фақатгина аккредитациялаш жараёнида эмас. Умуман олганда, медиа вакилларига яратиб берилаётган шароитлар ҳам аянчли аҳволда. "Пахтакор" стадионида ўтказилган Венесуэла - Тринидад ва Тобаго ўйинига ҳам бордим. Ўйиндан кейинги матбуот анжумани умуман ташкил этилмади. Футболчилар интервью бериши учун алоҳида ажратиладиган "mixed zonе" қаерда жойлашганини эса ярим соатдан кўпроқ вақт ўтганидан сўнг ўзим топиб олдим. "Бунёдкор" стадионида эса сўнгги маротаба МТЖнинг қайси ўйинида wi-fi ишлагани ва интернет барқарор ишлаб тургани эсимда йўқ. Габонга қарши учрашувга бир хорижлик журналист ташриф буюрибди. Медиа трибунада wi-fi ишламаётганидан хабар топганида, ёқасини ушлаб қолди. Мен ЎФА тақдим этаётган шароитларни Қатар ёки Саудиядаги шарт-шароит билан солиштирмаяпман. Ҳаттоки қўшни Қирғизистонда ҳам ОАВ учун терма жамоа иштирокидаги учрашувлар учун яратилган шарт-шароитлар анча яхши эди. 1941 йилда барпо этилган Бишкекдаги "Долон Омурзаков" стадионидаги интернет, ҳашаматли "Бунёдкор" стадионидаги интернет тезлигидан барқарорроқ ва тезроқ.
