SportRADAR ma'lumotiga ko'ra, O'zbekiston chempionatida o'tkazilgan uchrashuvlardan 53tasi shubhali deb topilgan. To'g'ri o'qidingiz: 5 yoki 3 emas - 53...

Ortiq o'zgarish, o'zgartirish payti kelgandi. 2019 yil avvalida Umid Ahmadjonovning tashabbusi bilan futbol faoliyatini nazorat qilish uchun boshchiligida rostakam inspekciya tuzilib, unga Dilshod Hakimov mas'ul qilib qo'yildi. Bu korrupcion holatlarga qarshi faqat so'zda emas, amalda ham kurashish imkoniyatini paydo qilgan edi.

Natija o'zini uzoq kuttirmadi. Aprel oyiga borib kelishilgan o'yinlar tashkil qilgani uchun "Navbahor" jamoasining sobiq bosh murabbiyi Ilhom Mo'minjonov 5 yilga diskvalifikaciya qilindi (keyinchalik bu muddat qisqartirilgan)...

O'sha yilning yozida O'zbekiston Respublikasi Davlat Xavfsizlik Xizmati raisi Abdusalom Azizovning O'FA prezidentiga aylanishi totalizator va kelishilgan o'yinlarga qarshi "jang"ni kuchaytirdi...

Bu boradagi ishlar 24 dekabr kuni o'tkazilgan kongressda alohida etirof qilindi. Shundan keyin O'FA rasmiy saytida e'lon qilingan xabarlar asosida nechta ish o'rganilganini sanab chiqdik. Raqamlar kutganimizdan ancha ko'p chiqqani kishini xursand qiladi.

Maxsus inspekciya faoliyatini boshlaganidan beri 34 ta korrupcion holatni aniqlagan. Ular bo'yicha 70ga yaqin futbolchi, hakam, murabbiy, shuningdek, rasmiy shaxslar hamda klublarga nisbatan chora ko'rilgan.

Faqat O'FA prezidentiga bo'ysunadigan tuzilmaning faolligi butun futbol jamoatchiligini muntazam sergak bo'lishga, xato qilmaslikka chaqiryapti. Shu tufayli kongressda inspekciya faoliyati yanada kuchaytirilishi e'lon qilindi. Ayni paytda barcha klublar bu yo'lda birlashishi va futbol rivoji uchun mas'ullarga ko'maklashishi so'ralmoqda. Bir so'z bilan aytganda, futboldagi halollik uchun barcha birdek javobgar bo'lishi kerak.

Korrupsiya. Nechta holat aniqlandi?