Ўзбекистон миллий терма жамоаси Колумбияга қарши кечадиган ўта муҳим учрашувга қизғин ҳозирлик кўришни давом эттирмоқда. Бутун мамлакат нигоҳи бўлажак синовга қаратилган бир пайтда, биз ўзбек футболи ичидаги таниқли инсонлар ва мутахассисларнинг фикрлари билан қизиқишда давом этамиз.
Бу сафар бўлажак учрашув аҳамияти, жамоамизнинг руҳий ҳолати ва кутилаётган баҳс умумий манзараси ҳақида Ўзбекистон футболчилар уюшмаси раҳбари Камолиддин Мурзоев ўз мулоҳазаларини ўртоқлашди:
- Осиё терма жамоаларининг ўйинларига қандай баҳо берасиз? Бу ҳақиқатдан реал натижами ёки иштиёқ ҳисобига шундай бўляптими?
- Бу реал натижа ҳисобланади. Осиё футболи аста-секинлик билан ривожланмоқда. Тўғри, биз ўрганиб қолган Европа гигантлари, ЕЧЛдаги кучли жамоаларга таққослай олмаймиз. Лекин умумий ўсиш нуқтаи назаридан олсак Осиёда футболга оид жуда кўплаб ишлар амалга оширилди. Бунинг натижалари кўринмоқда. Қолган жамоалар бундандан яхши натижа кўрсатади. Улар орасида Ўзбекистон ҳам ўз ўйинини намойиш қила олади.
- Австралия - Туркия ўйини сценарийси Ўзбекистон билан такрорланиши мумкинми?
- Бу Жаҳон чемпионати. Кўпчилик ўз қараши, фикрига эга. Хаттоки ўша жамоалар мураббийлари ҳам ўйинни олдиндан боришини айтиб бера олмайди. Бу кўплаб факторларга боғлиқ. Фаворитлар фақат ўйиндан олдин сонларда акс этяпти, майдонда бошқа ўйин кечяпти. Шунинг учун биз бу жамоалар каби ўйнаймиз дея олмаймиз. Мураббийлар штаби, футболчиларимиз ўз ўйинимизни кутяпти. Натижа қандай бўлишидан қатъий назар ўз футболимизни кўрсатишимиз керак.
- Биринчи ўйиндан олдинги ҳиссиётлар...
- Илк учрашув катта қизиқиш билан кутилмоқда. Ушбу беллашув дунёнинг энг кучли футболчиларига қарши кечиб, йигитларимизнинг ҳақиқий даражасини аниқлаб беради ва ўзбек футболи нуфузини халқаро майдонда намойиш этишга хизмат қилади.
- Ўзбекистон терма жамоасида Колумбия билан ўйиндан аввал қандай устунлик ва камчилик бор деб ўйлайсиз?
- Ҳозир устунлик ёки камчиликларимизни муҳокама қилиб ўтирадиган вақт эмас. Биз мана шу юқори даражага етиб келдик. Мусобақада фақат энг кучли жамоалар йиғилган ва бундан буёғига ким ўз имкониятларидан максимал даражада фойдалана олса, ўша натижага эришади. Колумбиянинг кучли жамоа эканлигини инкор этмаймиз, бироқ бу улардан қўрқишимизни ёки улардан заифроқ эканимизни англатмайди. Буни ҳамма тушуниб турибди. Рақибга ҳурмат сақлаган ҳолда ўз ўйинимизни намойиш этишимиз керак. Бу баҳсда фақатгина бир ўйин натижасига эмас, балки умумий манзарага эътибор қаратиш зарур. Бу учрашув бизга кейинчалик қайси йўналишда давом этишимиз кераклигини кўрсатиб беради ва асосий кун тартибини белгилайди.
