- Ўйин ҳақида фикрингиз?
- Аввало бугунги ғалаба билан барча андижонлик мухлисларни табриклайман. Ўйин осон кечмади, аслини олганда чемпионатда осон учрашувнинг ўзи йўқ. Бу ўз навбатида жамоалар кучайиб бораётганидан дарак беради. "Хоразм"га қарши баҳс ҳам осон кечмаслигини билардик, шу боис ҳушёрликни йўқотмасдан охиригача ўйнашга ҳаракат қилдик. Бунинг учун йигитларга раҳмат айтаман. Футболда ҳимояда ўйнайдиган жамоага қарши тўп тепиш осон эмас, шунинг учун қанотларни ўзгартириб охирида рақиб дарвозасига йўл топа олдик.
- "Нефтчи" билан яхши ўйин кўргандик, аммо охирги иккита баҳсда шундай креативликни кўрмадик. "Андижон" рақибларга қараб ҳаракат қилаётгандек туюляпти.
- Биз рақибдан келиб чиққан ўйин кўрсатамиз демаган бўлардим. Чунки айтиб ўтганимдек, ҳозир кучсиз жамоанинг ўзи йўқ. "Хоразм"ни таҳлил қилиб чиққандик, кучли ва кучсиз томонларини ўргандик. Айтганимдек, ҳимояда ўйнайдиган жамоага қарши қийинроқ. Очиқ футбол ўйнайдиган жамоаларга нисбатан бизда ҳам кўпроқ вазиятлар бўлади. Рақиб олдинга ўтганда орқада бўшлиқ юаза келади, биз эса шундан фойдаланишга ҳаракат қиламиз.
- "Хоразм" ўйинни беш нафар ҳимоячи билан бошлади. Шундан келиб чиқиб икки нафар ҳужумчи билан ўйнасангиз бўлмасмиди?
- Режамизда бор эди, лекин ўйинга белгиланган тактикани бошидан ўзгартирсак нимадир ўхшамай қолиши мумкин эди. Кейинроқ иккинчи ҳужумчини майдонга тушириш режаси билан ҳаракат қилдик.
- Захирадан тушганлардан кўнглингиз тўлди деса бўлади.
- Албатта, шундай. Бугун захирадан тушганлар жамоамизга катта ёрдам берди. Бундан хурсандмиз.
- Трансфер ойнаси пайтида жамоа сафида Шоҳмалик Комилов қўшилди. Лекин уни захирадан тушишини ҳам кўрмаяпмиз.
- Шоҳмалик Комилов жуда иқтидорли футболчи, фақат ҳозирги кунда марказда рақобат кучлилиги боис Шоҳмаликда имкон бўлмаяпти. Унда ҳали имконият бўлади, чунки машғулотдарда ўзини яхши кўрсатяпти. Тез орада унга ҳам имкон берамиз.
- "Андижон" U-21 жамоаси иштирокидаги ўйинларда негадир асосий таркиб мураббийлари кўринмаяпти.
- Ўзимизнинг машғулот сабаб бора олмаётган бўлсак ҳам, Ютуб орқали ўйинларни кўриб боряпмиз ва мураббийлар билан ўзаро фикр алмашиб турибмиз. Ёшларимиз назоратсиз қолиб кетгани йўқ, ҳаммани назорат қилиб боряпмиз.
