- Чиройли ўйин бўлди. Биз Жайхунни курашувчан жамоа эканлигини билардик. Уларнинг ўтган икки турдаги ўйинини кўрдик. Жамоа юқори чизиқда прессинг қилишини ҳисобга олган ҳолда ўйинга тайёргарлик кўрдик. Шу орқали ўз мақсадимизга етдик ва қарши ҳужумларда рақибни ушладик. Жамоа мавсумни икки мағлубият билан бошлагани сабабли олдинга ўтишини кутгандик ва қарши ҳужумларга таяндик. Йигитларга катта раҳмат. Улар кўрсатмаларни тўғри бажаришди.
- Бугунги ўйинда жамоангиз ҳаводаги тўп учун курашда мағлуб бўлмади. Бу ушбу ўйин учун бўлган алоҳида тайёргарликмиди ёки жамоанинг ютуғи?
- Ҳимоячиларимиз бу жабҳада яхши ҳаракат қилишади. Уларнинг кўпчилиги жуда тажрибали. Уларнинг тажрибаси эвазига биз ҳаводаги тўпларда ғолиб бўлдик.
- Жамоа иккинчи бўлимда тўпни ушлаб туриш орқали темпни туширишга ҳаракат қилди.
- Рақиблар узун паслар орқали ҳимоядан чиқар экан. Биз уларнинг услубига тушиб қолмаслик учун эътиборни тўпби ушлашга қаратдик. Паслар орқали ҳимоядан чиқишга интилгандик, лекин майдон ҳолати бунга йўл қўймади. Барибир сунъий майдонда футбол ўйнаш қийинроқ. Биз табиий майдонда ўйнаймиз. Шу сабабли бу майдонда футбол ўйнаш бизга қийинчилик туғдирди.
- Бугунги ўйинда жамоангиздаги камчиликларни кўриб олган бўлсангиз керак. Кейинги ўйинда таркибда туб ўзгаришлар қилинадими?
- Йўқ. Таркибимизга ишонамиз. Футболчилар ақлли, тартибли. Яхши футбол ўйнашни билади. Айтилган вазифаларни бажаради. Шу йигитлар орқали биз курашамиз ва мухлисларни хурсанд қилишга ҳаракат қиламиз.
