Ўйиндан кейин "Арал" бош мураббийи Неъматилло Қутибаев матбуот анжуманида иштирок этди.
- Ўйин ҳақида фикрингиз?
- Ғалабани қўлдан чиқардик. Яхши ўйин кўрсатдик деб ўйлайман. Лекин тўлиқ учрашув ҳақида гапирадиган бўлсак, ҳар икки жамоа тенгма-тенг бир очкога лойиқ ҳаракат қилди.
- Баҳс охирларида нима етишмади?
- Футболчиларимизда жароҳат борлиги боис таркибда муаммолар бор. Шу боис узоқ вақт футболчи алмаштира олмадик. Менимча, йигитлар толиқиб қолди деб ўйлайман. Майдон ҳам оғир экан.
- Иккинчи таймда жамоангиз орқада ўтириб қолди.
- Тўғри айтяпсиз, шундай бўлди. Олти нафар футболчимизда жароҳат бор ва улар Нукусда қолган. Тўртинчи турдирки ҳар тўртинчи кунда майдонга тушяпмиз. Узоқ масофага қатнаяпмиз, бу ҳам ўз таъсирини кўрсатяпти. Бугун тўпни рақибга топшириб, қарши ҳужумларда ўйнашга ҳаракат қилдик. Чунки футболчиларимиз камлиги учун шундай қилмасак бўлмасди.
- Бу йил Пролигада жамоалар сони ортди, шу билан бирга "Металлург", "Каттақўрғон" каби пулдор жамоалар пайдо бўлди. Буёғига янада қийин бўлади деб ўйлайсизми?
- Ўтган йил ҳам қийин бўлганди. Мусобақада осон ўйинлар бўлмайди. Ҳамма курашади, биз ҳам ҳаракат қиламиз.
- Ҳозирги ўзбек футболида клублардаги молиявий ҳолат биринчи ўринга чиққан. Бу борада "Арал"нинг ҳолати қандай?
- Бизда ҳаммаси зўр. Ойлик маошлардан, бонус пулларидан ҳеч қанақа муаммо йўқ.
- Натижага эришиш учун фақат тактика ёки майдондаги ўйин эмас, балки чемпионлик руҳияти ҳам шаклланиши керак бўлади. Ўтган йил "Арал" ўз ўйинлари билан Суперлигага ниҳоятда яқинлигини кўрсата олди. Нима деб ўйлайсиз, бу йил жамоада мана шу руҳият шаклланиб улгурдими?
- Жудаям зўр савол. Ҳар куни футболчиларга сизлар кечаги ёш болалар эмассиз деб айтамиз. Ўзига ишонч ортиб бориши ва жамоа майдонга дадил чиқиши керак. Кўз тегмасин ҳозир жамоамиз яхши, лекин руҳият қанчалик шаклланганини мавсум давомида билиб оламиз. Ҳаммага жанг таклиф қилишга ҳаракат қиламиз.
- Бугун жамоангиз барибир тетик кўринди.
- Ўйинга жиддий ҳозирлик кўргандик. Узоқ йўл босиб келиб кучни сақлаш учун прессинг билан қарши ҳужумни танладик. Футболчиларга ўзларини эҳтиёт қилишлари кераклигини айтдик. Ўз имкониятимизни кутиб ўйнадик.
