Рамос бокcдаги илк жангини ўтказиши мумкин. Рақиб ва сана маълум

У дарҳол медиа макондаги энг шов-шувли шахслардан бирига қарши рингга чиқиши эҳтимол қилинмоқда.

X ижтимоий тармоғидаги Moslee аккаунти маълумотларига кўра, 39 ёшли испаниялик Misfits Boxing лигаси турнирида америкалик блогер Эндрю Тейтга рақиб сифатида кўрилмоқда. Мусобақа 22 август кунига режалаштирилган.

Хабар қилинишича, жанг 88,5 кг гача бўлган вазн тоифасида, ҳар бири 3 дақиқадан иборат 6 раунд форматида ўтиши мумкин. Расмий анонс яқин кунларда чиқади.

Рамос учун бу бокc рингидаги илк расмий чиқиш бўлади. Шу билан бирга, "Реал" собиқ сардорининг яккакурашларга бўлган қизиқиши анчадан бери сир эмас: интернетда уни машҳур жангчилар, жумладан UFC чемпиони Илия Топурия билан машқ қилаётган видеолари тез-тез пайдо бўлиб туради.

Тейтга келсак, 39 ёшли блогер 2025 йилнинг декабрида 5 йиллик танаффусдан сўнг жангларга қайтган. Ўшанда у кикбоксинг қоидалари бўйича ўтган баҳсда Чейс Де Мурга очколар ҳисобига мағлуб бўлган.

Серхио Рамоснинг сўнгги клуби Мексиканинг "Монтеррей" жамоаси бўлиб, ҳимоячи декабрь ойи бошида жамоани тарк этган.