Ислом Исмоилов: "Финалда тактикадан кўра футболчиларнинг характери юқори планга чиқади" (тўлиқ матбуот анжумани)

Ислом Исмоилов: Эртанги ўйинга етарли даражада тайёргарлик кўрдик. Финалларда тактикадан кўра футболчиларнинг характери юқори планга чиқади. Шу боис эртага жамоа ўзининг энг жанговар характерини кўрсатади.
 
Анвар Ғофуров: Рамазон ойи билан ҳаммани табриклайман. Ўйинга яхши тайёргарлик кўрдик. Эртанги учрашувга максимал тайёрмиз. Мураббийларнинг кўрсатмаларини бажаришга ҳаракат қиламиз.

– "Нефтчи" таркибида сифатли футболчилар кўп, айниқса ҳужум тизимида ранг-баранглик етарлича ва Суперлигани исталган бошқа клубида асосий таркибда ўйнаши мумкин бўлган айрим футболчилар "Нефтчи"да захирада қолиб кетяпти. Бу сизга қанақадир муаммолар келтириб чиқармаяптими? Бу муаммони умуман қанақа қилиб бартараф этмоқчисиз? Футболчиларни айримларда эго бўлади, буни енгиш учун нима ишлар қилиняпти? 
 
Ислом Исмоилов: Ҳар бир мураббий жамоасида шунақа яхши савиядаги футболчилар кўпроқ бўлишини хоҳлайди. Бу ёқимли бош оғриқ деса ҳам бўлади. Биз футболчиларнинг барчаси билан доимий равишда суҳбат олиб борамиз. Уларга тушунтирамиз ва ҳар бир учрашувда ҳар битта футболчига имкон қадар имкониятимиздан келиб чиқиб, ўйин амалиёти беришга ҳаракат қиляпмиз. Кузатиб бораётган бўлсангиз, кўп учрашувларда ротациялар қиляпмиз. Шу орқали жамоадаги балансни ушлаб туришга ҳаракат қиляпмиз. Футболчилар ҳам профессионал, улар жамоага келишидан олдин бу ердаги ҳолатни билган ва рақобатга тайёр бўлган ҳолатда келган. Бу фақатгина жамоа фойдаси учун хизмат қиладиган ҳолат.
 
– Биламиз, катта финалларда дастлабки дақиқалардан гол уриб олиш бу жудаям катта руҳ бериши мумкин. Режангиз дастлабки дақиқалардан босим қилиб гол уриб олишми ёки эҳтиёткорликка эътибор қаратишми?
 
 – Албатта, ҳар битта жамоа тезроқ гол уришга ҳаракат қилади, шулар қаторида биз ҳам. Ўйин услубимиздан келиб чиқадиган бўлсак, доимий равишда рақибга босим уюштиришга ҳаракат қиламиз. Агар ўйин бошида гол урадиган бўлсак, бу бизга қўшимча яна мотивация беради.

– Икром Алибоев ҳақида сўрамоқчи эдим. У эртанги учрашувга тайёрми? Адашмасам, жароҳатдан тузалганди.
 
Ислом Исмоилов: Албатта, Икром Алибоев эртаганги учрашув учун юз фоиз тайёр ҳолатда.
 
– "Пахтакор"га қарши ўйин кескин ўтади. Суперкубок баҳсида жамоангизнинг устун томони нимада деб ўйлайсиз?

Ислом Исмоилов: Жамоани, айнан "Пахтакор" билан солиштириб, устун томонларини айтишим нотўғри бўлади. Жамоа ҳолатига келадиган бўлсак, ҳозир ажойиб ҳолатда, муҳит яхши, кайфият юқори даражада, учта қаторасига ғалабадан кейин футболчиларни ўзига бўлган ишончи баланд. Шунинг учун ўзимизни ҳолатимиздан келиб чиқиб айтадиган бўлсак, эртанги учрашув учун юз фоиз тайёрмиз ва рақибдан устун томонларимизни бу ерда оғизда эмас, балки майдонда кўрсатишга ҳаракат қиламиз.

–  Эртанги ўйинда жамоангиз ҳужумкор ўйин намойиш этадими ёки ҳимоявий?
 
Ислом Исмоилов: Доимий равишда ҳужумкор футбол намойиш этишнинг иложи йўқ. Жамоа қайсидир ҳолатда ҳимояланади, қайсидир ҳолатда ҳужум қилади. Ҳужум билан ҳимоя футболнинг ажралмас қисми. Шунинг учун иккаласида ҳам етарли даражада аниқ ўйнашга ҳаракат қиламиз.
 
– Ўтган йили Суперлигада "Нефтчи" ва "Пахтакор" учрашганда фарғоналиклар мағлубиятга учраган. Қайсидир маънода эртанги ўйинни реванш дейиш мумкинми?
 
Ислом Исмоилов: Биз ҳеч қайси учрашувда қасос учун майдонга чиқмаймиз. Аксинча, сифатли футбол намойиш этиш учун майдонга чиқамиз. Ҳар битта ўйинда ғалаба учун майдонга чиқамиз. Шунинг учун бу ерда ҳеч қанақа қасос олиш деган тушунча йўқ. Аксинча, ғалаба қозониш учун максимал ҳаракат қиламиз. 
 
– "Нефтчи" принципиал рақибларга қарши яхши ҳаракат қилади. Рақибни тўлиқ ўрганган бўлсангиз, эртанги учрашув олдидан "Пахтакор"нинг қайсидир ҳужумкор футболчиларини индивидуал қўриқлаш учун футболчиларга нималар дедингиз, вазифа бердингизми ёки улар умумий картинадан келиб чиққан ҳолда ҳимоявий ўйин намойиш этишадими?  
 
Ислом Исмоилов: Албатта, жамоани ўрганиб чиқдик. Ҳар битта майда деталларгача эътибор қаратдик. Ҳимояланишга келадиган бўлсак, ҳеч қачон алоҳида футболчига эътибор қаратган ҳолда ҳимояланмаймиз. Рақибнинг ҳар битта футболчисига жамоа бўлиб ҳимояланишга ҳаракат қиламиз. Айнан қайсидир футболчига ўзимизни футболчимизни бириктириб ҳимояланмаймиз.

 
– Ўтган тур кутилмаганда "Пахтакор" мағлубиятга учради. Рақибни ўрганиш, яъни ўша ўйиндан келиб чиқиб таҳлил қилинмаган бўлса керак, катта эҳтимол. Қанчалик "Пахтакор"ни ўрганиш қийин бўлди? Ўтган ўйинни ҳисобга олган ҳолда. Ўтган ўйинда "Пахтакор"да деярли ҳеч нимаси ўхшамади.  
 
Ислом Исмоилов: Рақибнинг битта ўйинига қараб баҳо бермаймиз. Рақибнинг охирги бешта учрашувини кўриб чиқамиз. "Пахтакор"нинг ўтган йилги иккита охирги учрашуви ва ундан ташқари бу йилги чемпионатдаги учта ўйинни ҳам ўрганиб чиқдик. Албатта, бу осон жараён эмас. Бу жуда катта вақт ҳамда диққат талаб қиладиган ҳолат. Ўйлайманки, "Пахтакор"ни етарли даражада ўргандик ва сиз айтиб ўтганингиздек, охирги ўйинга қараб хулоса қилганимиз йўқ. "Пахтакор", биламиз, Ўзбекистонда энг яхши жамоалардан бири. 
 
– Икром Алибоевни юз фоиз тайёр деб айтиб ўтдингиз. Агар Икром Алибоев юз фоиз тайёр бўлса, уни Жокич билан алмаштирасизми ёки иккита ҳужумкор ярим ҳимоячи билан ўйнатасизми, Искандеров ҳам бор, улардан бири захирада ўтирадими? 
 
Ислом Исмоилов: Балки Икром Алибоев ўнг қанотда ўйнар. Шунча футболчига жой топаяпмиз, Икромга ҳам топамиз.
 
– Ўтган ўйиндан кейинги матбуот анжуманида қизиқ фикр айтдингиз, яъни ҳар ўйинда статистикалар янгиланиб боряпти дедингиз. Эртага қайси антирекордни бузмоқчисиз?
 
Ислом Исмоилов: "Нефтчи" ўз тарихида илк марта Суперкубокда. Шунинг учун бутун жамоа билан тарих ёзиш учун ҳаракат қиламиз. Ўйлайманки, уддасидан чиқамиз.
 
– Анваржон, бош мураббий айтиши бўйича, жамоа Суперкубок учрашувига тайёр. Футболчи сифатида жамоадошларингиз ва ўзингиз бу ўйинга қанчалик тайёрсиз, "Нефтчи" тарихидаги биринчи Суперкубок финали қанчалик ҳаяжон олиб келяпти? 
 
Анвар Ғофуров: Албатта, финалда ҳаяжон бўлиши аниқ. Кайфиятимиз яхши, ўйинга тайёрмиз. Суперкубок мен учун ҳам биринчиси. Ҳаяжон бор. Йигитлар билан яхши тайёргарлик кўряпмиз. Эртанги баҳсга тайёрмиз.

– Жамоа юз фоизлик натижа қайд этган, тўққиз очко, учта ғалаба. Рақиб эса аксинча, мағлубият, дуранг. Мана шу ҳолат футболчиларда бироз хотиржамлик ҳиссини уйғотмаяптими? 
 
Ислом Исмоилов: Албатта, бу бўйича ҳам футболчилар билан гаплашганмиз. Финал ўз номи билан финал, битта ўйин учун иккала жамоа ҳам етарли даражада жанговар руҳда тайёргарлик кўради. Шунинг учун ўйлайманки, бу ҳолат футболчиларни бўшаштирмайди. Аксинча, эртага футболчилар чемпионат ўйинларига қараганда кўпроқ хоҳиш ва истак билан майдонга чиқишади. 
 
– "Пахтакор" бош мураббийига ҳам олдинроқ савол берилди, яъни ўша учта учрашувдан келиб чиққан ҳолда, учта ғалаба қозониб келяпти "Нефтчи" ва қайсидир маънода "Нефтчи" фаворитмасми деганда, йўқ, ички чемпионат ўйинлари бошқа, Суперкубок алоҳида битталик ўйин бошқа деди. Шунга қандай қарайсиз?  
 
Ислом Исмоилов: Албатта, финалда исталган натижа қайд этилиши мумкин. Шунинг учун финалда фаворит йўқ. Балки иккала жамоа ҳам муносиб. Бошида айтиб ўтдим, финалларда тактикадан кўра руҳий ҳолат ҳамда хоҳиш-истак биринчи ўринга чиқади. Шунинг учун эртага ким кўпроқ хоҳласа, ким кўпроқ ҳаракат қилса, ўша жамоа ютади деб ўйлайман.