Миржалол Қосимов: "Юриб футбол ўйнайдиган пайтлар ўтиб кетди"

- Ўйин ҳақида фикрингиз?

- Қизиқарли ўйин кутгандик. Мағлубиятга лойиқ эмасдик. Биринчи бўлимда иккита қулай вазиятга эга бўлдик. "Динамо"ни ўрганиб чиқиб қарши ҳужумларда яхши ўйнашини билардик. Ўз хатоимиз туфайли гол ўтказиб юбордик. Иккинчи бўлимда вазиятни ўнглашга ҳаракат қилдик, лекин уддасидан чиқмадик. Ўтган ўйинда ҳам тўп кирита олмагандик, бугун ҳам шундай бўлди. "Динамо"ни ғалаба билан табриклайман. Бугун бу жамоа яхши ҳимояланди.

- Турнир жадвалида жуда зич ҳолат юзага келган. Шу ҳақда фикрингиз?

- Ҳали ҳаммаси олдинда. Буёғига ҳар бир очко учун шундай шиддат кечади. Навбатчи ўйинлар умуман қолмади. Суперлигада 7та жамоа билан 9та жамоа ажралиб қолди. Кимдир қуйида жон сақлаш учун, кимдир юқорида чемпионлик учун ҳаракат қиляпти. Бизда ҳам ўйинлар кўп ва тўхтаб қолмаймиз.

- ОКМК бу мавсум бир неча бор камбэк амалга оширди. Бугун ҳам шунга яқиндек кўринди.

- Футболда гол уриш ўйин ўзгаришига сабаб бўлади. Лекин зич ҳимояни ёриб ўтиш осон эмас. "Динамо" гол ургач зич ҳимояга ўтди, бу эса бизга муаммолар келтирди.

- Узоқ муддатдан кейин Сардор Мирзаев ўйин қайдномасига киритилди. У қачон майдонга тушади?

- Сардор Мирзаев оғир жароҳатдан сўнг тикланишга мажбур бўлди. Жароҳатдан тузалиб бирданига ўйнаб кетиш осон эмас. Барибир мияда озроқ қўрқув бўлади. Футбол курашли ўйин. Мирзаевда тажриба катта ва у жамоамиздаги ёшларга яхши ўрнак бўлиб келяпти.

- Ҳозирги турнир жадвали футболимиз даражаси яхши дейишга асос бўлади, тўғрими?

- Ким айтди ёмон деб. Бир гапни айтаман, четдан келаётган кўп легионерлар Ўзбекистонда пиёда юриб футбол ўйнайман деб ўйлайди. Лекин кўряпмизки, ҳамма югуряпти. Юриб футбол ўйнайдиган пайтлар ўтиб кетди. Бу ҳам чемпионатиммиз даражасидан. Ўз футболимизни асло пастга уришимиз керак эмас.