"Ал Ҳилол" бош мураббийи Симоне Инзаги: "Икки бор тўп ўтказиб юборган бўлсак-да, якунда ғалабага эришдик"

Бунда дастлаб меҳмонлар бош мураббийи Симоне Инзаги ва учрашувнинг "Энг яхши футболчиси" деб топилган Маркос Леонардо иштирок этди.

Бош мураббийга савол:

- Ўйин ҳақида фикрингиз?

- Бугун жуда чиройли ўйин ўтказдик. Учрашув ҳарорати анча баланд бўлди. Ғалаба учун футболчиларимга раҳмат айтаман. Гарчи икки бор тўп ўтказиб юборган бўлсак-да, якунда ғалабага эришдик. Кўп вазиятлар яратдик. Рақиб жамоада ҳам имкониятлар бўлди ва иккита гол уришди. Ғалаба қозонганимиз футболчиларимизнинг жисмоний ва руҳий ҳолати яхши эканини англатади.

Маркос Леонардо: - Биз яхши ўйин ўтказдик. Ғалаба жуда зарур эди, чунки бу мусобақада ҳар бир жамоа билан бир мартадан ўйнаймиз. Энди навбатдаги ўйинларга тайёргарлик кўрамиз.

- Бугун "Ал Ҳилол" ўз кучини тўлиқ намойиш эта олдими?

- Биз ҳар доим яхши ўйин кўрсатишга ҳаракат қиламиз. Хоҳ уйда ёки сафарда ўйнайлик, доим ўз кучимизни кўрсатишга интиламиз. Бугун ҳам тўп назорати кўпроқ жамоамиз томонида бўлди, бу эса яхши ҳаракат қилганимизни англатади.

Бош мураббийга савол:

- "Насаф"нинг ўйин услубини Европанинг қайси жамоасига ўхшатдингиз?

- Европада қайси клуб "Насаф"га ўхшаш ўйин намойиш этишини билмайман. Лекин "Насаф" яхши шаклланган жамоа экан ҳамда кучли мураббий бошқаряпти деб айта оламан. "Насаф"нинг сафарда "Ал Аҳли"га қарши ўйинини кўргандик, менда илиқ таассурот қолдирган.

- Жамоангиз бугунги ўйинда иккита гол ўтказди. Бунга нима таъсир кўрсатди? Майдон ҳолати ҳам сабаб бўлдими?

- Айтиб ўтганимдек, иккита гол ўтказган бўлишимизга қарамай ўйинни яхши ўтказдик. Тўп назорати асосан биз томонда бўлди. Рақибнинг биринчи голи жуда ажойиб чиқди, иккинчи гол эса ўз хатоимиз туфайли юзага келди. Кетма-кет ўйинларда майдонга тушяпмиз, охирги 7та ўйиннинг бештасида ғалаба қозониб, икки бор дуранг ўйнадик. Ҳали ишлайдиган жиҳатларимиз кўп.

- "Насаф" таркибидаги қайси футболчиларнинг ҳаракати сизга маъқул келди?

- Кўп ўйинчилар яхши ҳаракат қилишди. Айниқса дарвозабон ўзини кўрсатди. Жиддада кечган учрашувда "Насаф"нинг 6-рақамли футболчиси (Муродбек Раҳматов) жуда яхши ўйин кўрсатганди, лекин нима учундир бугун кўринмади.