Илёс Зейтуллаев: "Мени худо шундай яратган экан. Сочларим тўкилиб, соқол ўсиб чиқди. Менга Спалетти ёқади, лекин мен ангренлик Илёс Зейтуллаевман"

"Бундай меҳмондўстлик учун раҳмат. Айниқса бугунги ажойиб атмосфера учун. Футболчилар бундай атмосферада ўйнаши ёқимли ва қўшимча куч беради. Биринчи таймни жуда яхши ўтказдик. Танаффусдан кейин эса "Хоразм" устунлик қила бошлади. Йигитларга миннатдорчилик билдираман, улар нечанчи бор жасорат кўрсатишмоқда. Биз қандай вазиятда эканлигимиз фақатгина ўзимиз биламиз. Бу ҳақда олдинги учрашувларда ҳам айтиб ўтгандим. Йигитларга бирга курашишмоқда", - деди Илёс Зейтуллаев учрашув якунлангач.

- "Бунёдкор" ҳимояда деярли хато қилмади...

- Ўтган мавсум билан солиштирганда, бироз ўзгариш қилдик. Услубимиз ўзгарди. Янги услубдаги вазифалар яхши бажарилмоқда. Бундай ўйинимизга йигитлар сабабчи. Улар ўйинни ўқишмоқда. Шу сабабли ғалабани футболчиларимга бағишлайман.

- Барча ўзбек футболи мухлислари "Бунёдкор"даги молиявий муаммолардан хавотирда...

- Биласизми, бу саволга бошқа инсонлар эътибор қаратади деган умиддаман. Барчамизнинг оиламиз бор. Келажакда эса нима бўлишини билмай турибмиз. Жамоамизда хорижлик мутахассислар ҳам ишлайди. Мураббийлар штабидаги бир мутахассис бизни тарк этяпти. У шундай қарор қабул қилди. Билмадим, насиб бўлса барчаси тез орада аниқ бўлади.

- Олдинда катта танаффус бор...

- Ҳа, биз йигитлар кичик таътилга чиқишади. Улар бунга лойиқ. Шу танаффус давомида яхши хабарлар янграйди деган умиддаман. "Бунёдкор"ни чет элдан ҳам кузатиб боришади. Мен бунга аминман. Танаффус давомида ўртоқлик ўйини ўтказамиз.

- Сизни ўзбек Спалетти деб аташади...

- Мен ўзимни ўзбек спагеттиси дейман(кулиб). Ҳозирги вақтда кимларгадир тақлид қилиш яхши эмас. Барчамизни худо яратган. Мени худо шундай яратган экан. Сочларим тўкилиб, соқол ўсиб чиқди. Менга Спалетти мураббий сифатида ёқади, лекин мен ангренликман. Яқинда ўз ватанимга қайтиб келдим ва шу ерда ишламоқдаман. Мен кўпроқ Зейтуллаев бўлишга ҳаракат қиламан.