Тимур Кападзе: "Биз яхшироқ ўйнадик ва ғалабага яқин эдик"

- Ўйин ҳақида фикрингиз?

- Биринчи навбатда Қўқон жамоасини ғалаба билан табриклайман. Кутилганидек қийин учрашувни ўтказдик, вазиятлар бўлди, гол уришимиз керак эди. Ўйин охирида рақибимизнинг омади келиб гол уриб ютиб кетди. Намангандан келган мухлисларнинг ҳаммасига раҳмат айтаман ва ютқазганимиз учун узр сўрайман. Биз ҳам ғалаба учун ҳаракат қилдик. Гол урдик, лекин пенальтидан кейин ўйинимиз бироз бузилди. Иккинчи таймда ҳам тўп киритишимиз керак эди. Олдинда учрашувлар кўп, тезроқ бу ўйинни унутиб бўлажак баҳсларга ҳозирлик кўрамиз. Ҳар бир ўйиндан тўғри хулоса чиқарамиз. Бугун ҳар бир футболчимиз яхши ҳаракат қилди, ҳамма борини берди.

- Ўйин охирида Ўткир Юсупов билан ҳолатни айтиб ўтсангиз. Ўзи билан гаплашдингизми? Юсупов яқинда жароҳатини тиклаб майдонга қайтганди.

- Ўткир рақиб жарима майдончасига кириб борган маҳал тўқнашув рўй берди. Бунинг ваҳимали томони йўқ, дарвозабонимиз ўзини яхши ҳис қиляпти.

- Жаҳон чемпионатига ҳам оз вақт қоляпти-да. 

- Энди насиб қилгани бўлади. Мундиалга бориш кимга ёзилган бўлса, ўша боради. Ҳали ўйинлар кўп ва ҳар хил вазият бўлиши мумкин.

- Захирадан қўшилганлар негадир ўйинни кучайтира олмади?

- Йўқ, аксинча, захирадан тушганлар ўйинни яхши ўтказишди. Учрашув олдидан олти нафар йўқотишимиз бор эди. Таркиб борасида ҳам қийинчиликка дуч келдик. Аммо бошқалар ўзларини кўрсатди.

- Забихилло Ўринбоевнинг инобатга олинмаган голи ҳам таъсир қилдими?

- Барибир таъсир қилади. Голимиз бекор қилинди, кейин ҳакам ВАРни кўриб пенальти қўйди. Хуллас эпизодларга бой ўйин бўлди. "Қўқон-1912" ўз уйида курашувчан жамоа эканини билардик, шундай бўлди ҳам. Албатта, биз ҳам ғалаба учун келгандик, лекин омад келмади. Хатолар ҳам, ҳаракат ҳам бўлди. Биз яхшироқ ўйнадик ва ғалабага яқин эдик. Майдон ҳам оғир, ўт баланд экан, бу эса рақибга қўл келди. Майдонда тўп секин юрди, бизга оғирлик қилди, майдон ҳолати билан кураш олиб бордик.

- "Навбаҳор" кучли жамоаларни ютиб, ўртамиёна жамоаларга ютқазяпти. Кейинги тур "Машъал" билан бўлади. Ўртамиёна клубларга қарши жамоани тайёрлаш қийин кечяптими?

- Ҳар бир ўйинни таҳлил қилиб боряпмиз. Бунга албатта вақт керак. Йўқотишлар ҳам бор. Бу вақтинчалик нарса деб ўйлайман. Жамоанинг ичидаман ва ҳаммасини билиб турибман. Жамоамиз ўйини яхши шаклланган ва қаердадир кичик деталларни тузатишимиз керак. Секин-аста ҳаммаси яхши бўлади.