Рифат Акрамхўжаев: "Асосий мақсад яхши футболчиларни тарбиялаб бериш"

Бу йил ҳам ПФЛ томонидан Республика U-18 биринчилиги ташкил этилади. Фақат аввалги икки йилда ўтказилган мусобақадан фарқли ўлароқ бу йилгиси Суперлига ва U-21 ёшлар лигаси билан биргаликда параллел равишда олиб борилади. 

Яъни Суперлига учрашувларидан бир кун олдин жамоаларнинг ўринбосарлари ўйин ўтказса, икки кун олдин U-18 жамоалари ўзаро майдонга тушишади. Рифат Акрамхўжаев "Локомотив" U-18 жамоасининг мавсумга тайёргарлиги ҳақида гапириб берди.

Тайёргарлик ҳақида 

- Янги мавсумга тайёргарликни 6 январдан бошладик. Ҳаммаси режа бўйича олиб борилди. Бир нечта ўртоқлик учрашувлари ўтказиб шу орқали футболчиларни текшириб олдик. 26 февраль куни "Андижон"га қарши баҳс билан мавсумни бошлаймиз. Ўйлайманки, ушбу мавсумда жамоамиз ўзини кўрсата олади. 

"Бунёдкор" U-18га қарши кечган ўртоқлик ўйини ҳақида 

- Ўйин яхши ўтди. Футболчилар имкониятлардан фойдаланиб рақиб дарвозасига учта тўп киритишди. Лекин назорат баҳсида барибир асосий эътибор ўйинчиларни текшириб олишга қаратилган бўлади. Муҳими расмий беллашувларда ўзимизни қанчалик кўрсата олишимизда. 

Таркиб ҳақида 

- Таркибдан кўнгил тўқ. 9 декабрдан "Локомотив" U-21 жамоаси учун селекция ишларини бошлагандик. Кейин U-18 учун яхши футболчиларни таклиф эта бошладик. Вилоятлардан ўзимизга маъқул келган ёшларни сафимизга жалб этдик. 

"Локомотив" U-18 олдига қўйилган вазифа ҳақида 

- Албатта, биз ҳам чемпион бўлишга ва ҳар бир ўйинда ўзимизни кўрсатишга ҳаракат қиламиз. Ҳаммага яхши маълум, "Локомотив" ўз олдига фақат юқори мақсадларни қўйиб келади. Лекин ўз навбатида биз учун энг муҳими асосий таркибга муносиб футболчиларни етказиб бериш ва бу йўлда енг шимариб ишлаймиз.