Клубда Хаби Алонсо билан боғлиқ таваккалчилик ўзини оқламагани ва Альваро Арбелоанинг тайинланиши кутилган натижани бермагани тан олинди.
"Marca" нашри хабарига кўра, Арбелоа ўз лавозимини сақлаб қолиши учун мавсум якунида ҳақиқий мўъжиза содир бўлиши керак. Мадридликлар аллақачон ёзда амалга ошириладиган жиддий ўзгаришларга тайёргарлик кўришмоқда. Қайта қуриш жараёни нафақат таркибни, балки мураббийлар штабини ҳам қамраб олиши мумкин.
Клуб раҳбарияти бир нечта чизиқлардаги ўйин сифатидан норози. Таркиб кучайтирилганига қарамай, ҳимоя чизиғи ишончли кўринмади ва жамоа ҳали ҳам Тибо Куртуанинг сейвларига боғланиб қолмоқда. Ярим ҳимояда эса мадридликлар топ-рақибларга, жумладан "Бавария"га имкониятни бой беришди. Жорий мавсумдаги йирик ғалабалар қаторида фақат "Манчестер Сити" ва "Барселона" устидан қозонилган муваффақиятларни ажратиб кўрсатиш мумкин.
Арбелоанинг ўзи клубнинг ҳар қандай қарорини қабул қилишини ва муаммо туғдирмаслигини билдирган. Бироқ Испанияда унинг жамоада қолиш имкониятлари жуда паст баҳоланмоқда.
Ҳозирда Арбелоанинг ўрнига асосий номзодлар сифатида Дидье Дешам ва Юрген Клопп тилга олинмоқда.
