Гуруҳ босқичи 2-турининг 38-дақиқасида Беллингем ганалик ҳужумчи билан гаплашаётиб, оғзини қўли билан ёпиб олди. Гондураслик ҳакам Саид Мартинес "Реал" футболчиси томонидан қоидабузарлик содир этилганини қайд этмади.
20 июнь куни Туркия ва Парагвай ўртасидаги ўйинда (0:1) ҳакам Иван Бартон Мигель Альмиронни Мерт Мюльдюрга оғзини ёпиб гапиргани учун майдондан четлатган эди. Рақибга оғзини ёпиб гапирганлик учун четлатиш қоидаси Жаҳон чемпионати бошланишидан олдин жорий қилинган.
Таъкидлаш жоизки, Халқаро футбол ассоциациялари кенгаши (IFAB) баёнотига кўра, можароли вазиятда гаплашаётганда оғзини ёпиб олган футболчига қизил карточка кўрсатилиши керак. Беллингем ва Айю ўртасида эса можаро бўлмаган.
Айрим парагвайлик манбаларнинг хабар беришича, Парагвай футбол федерацияси ФИФАга расмий шикоят билан чиқиб, янги қоиданинг ноизчил қўлланилаётганини билдирган. Хабарларга кўра, мактубда Англия ва Гана ўртасидаги ўйинда, хусусан, Беллингем ва Айю иштирокидаги эпизодда янги меъёрнинг қайта-қайта бузилгани тилга олинган.
"As" нашрининг ёзишича, ФИФАдаги манбаларга ҳеч қандай шикоят келиб тушмагани маълум, Парагвайдан ҳам расмий баёнот берилмаган. Агар шикоят келиб тушса, ФИФА иккала инцидентни ҳам кўриб чиқишга мажбур бўлади.
Шу билан бирга, Федерация Беллингемнинг четлатилмаганидан норози. "Қоида барча жамоаларга бир хилда қўлланилиши керак, акс ҳолда у ўз обрўсини йўқотади", — деди Парагвай футбол федерациясига яқин бўлган "As" манбаси.
