ФИФА қоидаларига кўра, мазкур ўртоқлик учрашувлари амалдаги футбол қоидаларига мувофиқ ўтказилиши шарт. Шунингдек, бу ўйинларга Халқаро ҳакамлар рўйхатига киритилган нейтрал ҳакамлар тайинланиши талаб этилади. Ушбу қоида ёрдамчи ҳакамларга ва ВАР тизими мутахассисларига ҳам тегишлидир. Терма жамоалар бундай баҳсларни мезбон мамлакатга етиб келган кунидан бошлаб, турнирдаги дастлабки ўйинига беш кун қолгунга қадар ўтказиш ҳуқуқига эга. Фақатгина бир гуруҳдан жой олган жамоаларнинг ўзаро ўртоқлик ўйини ўтказишига тақиқ қўйилган.
Эслатиб ўтамиз, 26 май санасида Ўзбекистон миллий терма жамоаси делегацияси Америка Қўшма Штатларига жўнаб кетади. Мазкур йиғин ва сафар доирасида вакилларимиз 1 июнь куни Канада миллий терма жамоасига қарши ўртоқлик учрашувида майдонга тушиши белгиланган. Демак, бўлажак назорат баҳси ҳам расмий мақомга эга бўлиб, унда қайд этилган натижа Ўзбекистон терма жамоасининг ФИФА рейтингидаги ўрнига бевосита таъсир кўрсатади.
ФИФА рейтингида айни дамда Канада 30, Ўзбекистон эса 50-ўриндан жой олган.
Маълумот ўрнида, Ўзбекистон МТЖ "K" гуруҳида Португалия, Колумбия ва Конго ДР билан беллашади.
Аввалроқ Жаҳон чемпионати якуний таркиблари қачон эълон қилиниши ва ундан неча нафар футболчи ўрин олиши ҳақида хабар берилганди.
