"Европанинг энг ҳурматли ва истиқболли мураббийларидан бири бўлган Гласнер футболчиларни ривожлантириш, шиддатли ҳужумкор жамоалар тузиш ва энг юқори даражада муваффақиятларга эришиш борасидаги юксак обрў-эътибори билан "Форест" сафига қўшилди. Унинг етакчилик фазилатлари, тактик маҳорати ва ғолиблик менталитети уни клубни янги даврга бошлаб бориш учун энг муносиб номзодга айлантиради.
Гласнер "Форест"га ҳам УЕФА Европа Лигаси, ҳам УЕФА Конференциялар Лигасида ғолиб чиққан тарихдаги учинчи бош мураббий сифатида ташриф буюрмоқда. Унинг Европадаги муваффақиятлари Англиядаги ички совринлар билан биргаликда, ғолиб жамоаларни шакллантириш борасидаги бой тажрибасидан далолат беради.
У "Вольфсбург" клубини УЕФА Чемпионлар Лигаси йўлланмаси сари етаклаган, сўнгра "Айнтрахт Франкфурт" жамоасини 2021/22 йилги мавсумда УЕФА Европа Лигаси чемпионлигига олиб келиб, клубга сўнгги қирқ йилдан ортиқ вақт ичидаги биринчи йирик Европа кубогини тақдим этган эди. Германиядаги фаолияти давомида унинг жамоалари ўзларининг юқори шиддати, тактик ташкилотчилиги ва ҳужумкор ўйин услуби билан кенг омманинг олқишига сазовор бўлди.
Яқин ўтмишда эса Гласнер инглиз футболида ҳам тезкорлик билан ўз сўзини айта олди: у Премьер-лигага келган биринчи тўлиқ мавсумидаёқ 2024/25 йилги Англия Кубогида (FA Cup), сўнгра Англия Суперкубогида (FA Community Shield) зафар қучди, кейинги мавсумда эса УЕФА Конференциялар Лигаси ғолиблигини қўлга киритди", - дейилади клуб тақдим этган хабарда.
