Дубай шаҳридаги "Забиль" стадионида 19 апрель куни ўтказилган мазкур баҳсда саудияликлар 4:0 ҳисобидаги йирик ғалабани қўлга киритишди. Мазкур муваффақиятли натижа эвазига "Ал Насср" жамоаси мусобақанинг ярим финалига йўлланма олди.
Ўйинда ҳисоб 11-дақиқадаёқ португалиялик юлдуз Криштиану Роналду томонидан очилди. Эътиборлиси, мазкур тўп киритиш Роналдунинг профессионал фаолиятидаги 969-гол сифатида қайд этилди. Шундан сўнг, меҳмонлар ҳужумкорликни янада ошириб, 24-дақиқада Мартинес ҳамда 26-дақиқада Ал-Амри томонидан киритилган голлар эвазига биринчи бўлимнинг ўзидаёқ катта устунликка эришишди. Учрашувнинг 80-дақиқасида эса Садио Мане "Ал Насср"нинг тўртинчи голига муаллифлик қилди ва ўйинга якуний нуқтани қўйди – 4:0.
Мазкур учрашувни ўзбекистонлик рефери Рустам Лутфуллин бошқариб борди. Таъкидлаш жоизки, ушбу ҳакам яқиндагина Ўзбекистон Суперлигасининг 6-тури доирасида бўлиб ўтган "Қўқон-1912" – "Насаф" учрашувида ҳам ишлаган ва ундаги бир қатор баҳсли қарорлари билан футбол жамоатчилиги ўртасида кескин мунозараларга сабаб бўлган эди.
