- Биз кутгандек ўйин бўлди. "Ғазалкент"нинг барча ўйинларини кўрганман, иқтидорли ёшлар кўп. Ўйин ташкил қилишда энг яхшилардан бири деб ўйлайман. Ўйинга келадиган бўлсак, биринчи бўлимда бизда ташаббус бўлди, бироқ вазиятлардан фойдалана олмадик. Иккинчи бўлимда эса иккита гол уриб олдик. Ўйин охирида эса натижа учун ўйнадик.
- Ўйин олдидан тахлил қилганингизда рақибнинг қандай камчиликларини кўргандингиз ва бундан жамоангиз қанчалик фойдалана олди?
- Биз кўпроқ стандартларга таянишни истадик ва биринчи голни шу тариқа уриб олдик. Кейин ўртада кўп прессинг қилишни истагандик. Бу режаларимиз ўхшадими йўқми, мухлислар баҳо бера қолишсин. Биринчи бўлимда марказда кўпроқ прессинг қилишга интилдик.
- Бекзод Аҳмаджонов ва Вепа Жумаевга кўп эътироз билдирдингиз. Уларнинг қайси жиҳатларидан кўнглингиз тўлмади?
- Тўпни кўп йўқотишди, айниқса биринчи бўлимда. Шундай гавдаси бор футболчиларда ўзларига ишонч йўқ. Вепа Жумаевни тушунса бўлади, у биринчи даврада ўйнамади ҳисоб ва унинг жисмоний ҳолати унчалик яхши эмас. Бекзод эса ўз танасидан тўғри фойдалана олмаяпти. Яхши футболчи бўлиши учун барча нарса етарли, фақатгина ўзига ишонч йўқ. Шунга бироз асабийлашдим.
- Руслан Қалмағамбетовнинг ўйинлари ҳақида фикрингиз, унга бошқа жамоалардан қизиқишлар бўлдими?
- Қизиқишлар кўп, айниқса Суперлигадан. У юқори даражадаги ҳужумчи бўлиши учун ҳали кўп ишлаши керак. У ҳали тўп билан юришда бироз кучсизроқ. Руслан ҳали яхши ҳужумчи бўла олади.
- Бугунги ўйин юқори темпда ўтди. Жамоангиз иштирокидаги қанча фоиз ўйин шундай темпда бўлди деб ўйлайсиз?
- Яхши савол бердингиз. Бизнинг асосий ютуғимиз - тезлик. Йигитлардан ҳар доим тезкор прессинг қилишни, қарши ҳужумда ҳам тезликни талаб қиламиз. Биринчи бўлимдан кейин ҳам йигитларга тезликни қўшишни талаб қилдим. Яхши, жанговар ва тезкор ўйин бўлди.
- Ўйинчи алмаштириш пайтида бироз асабийлашдингиз. Футболчингиз вақт чўзганига жахлингиз чиқдими ёки мураббийлардан?
- Иккита алмаштириш амалга оширмоқчи эдим. Қарасам мураббийлар алмаштириладиган футболчиларда хато қилишибди. Бу биринчиси эмас-да. Иккинчи марта шундай хато бўляпти. Шунга бироз ҳиссиётларга берилдим. Ўйиндан кейин барчадан узр сўрадим.
- "Арал" жамоасига Суперлигага чиқиш бўйича аниқ вазифа қўйилган. Ҳали трансферлар ойнаси ёпилгани йўқ. Шу таркиб билан Суперлигага чиқишга кўзингиз етадими? Чунки рақобатчилар жуда кучли.
- Тўғри савол. Суперлигадан икки футболчини олмоқчи эдик. Улар бизга ўтмади. Трансферлар ойнаси ёпилгунча иккита футболчи олишимиз керак. Шу футболчилар билан ҳозир биринчи ўриндамиз. Ўз йигитларимга ишонаман. Лекин барибир Суперлигада ўйнаган икки футболчи билан шартнома имзоламоқчимиз.
