Журналистларнинг саволларига жавоб берар экан, мутахассис жамоанинг мавсум иккинчи даврасига тайёргарлик режаларига ҳам тўхталиб ўтди.
Мураббийнинг таъкидлашича, жамоа 9 июнь санасидан иккинчи даврага тайёргарлик жараёнларини бошлайди. Режага кўра, йиғиннинг биринчи босқичи 9 июндан 24 июнга қадар Туркиянинг Анталия шаҳрида ташкил этилади. Мазкур йиғин давомида футболчилар жисмоний ва тактик тайёргарлик устида ишлаши, шунингдек бир қатор назорат учрашувлари ҳам ўтказилиши режалаштирилган.
Туркиядаги йиғин якунлангач, жамоа тайёргарликни клуб қароргоҳида давом эттиради ва мавсумнинг иккинчи қисми олдидан сўнгги ҳозирлик ишлари олиб борилади.
“Олдимизда масъулиятли иккинчи давра турибди. Ҳар бир жиҳатга жиддий эътибор қаратамиз ва мухлисларимизни хурсанд қилиш учун пухта тайёргарлик кўрамиз”, – дея таъкидлаб ўтди Ислом Исмоилов.
Шунингдек, Исмоиловнинг маълум қилишича, 8 июль куни “Нефтчи” Россиянинг Санкт-Петербург шаҳрида амалдаги мамлакат чемпиони — “Зенит” жамоасига қарши халқаро ўртоқлик учрашувида майдонга тушади.
Баҳс замонавий ва муҳташам “Газпром Арена” стадионида бўлиб ўтади ва жамоа ушбу учрашувда меҳмон сифатида иштирок этади.
“Зенит” — “Нефтчи”
8 июль
Санкт-Петербург, “Газпром Арена”
