"Моуринью ўзининг нишонлашларини унутиб қўйдими?" — Собиқ ҳакам Итурральде Винисиуснинг сариқ карточкаси сирини очиб берди

Мутахассис Винисиуснинг нима учун жазоланганига аниқлик киритди.

Карточка рақс учун эмас эди:

Итурральденинг таъкидлашича, бош ҳакам Франсуа Летексье бразилиялик футболчига рақс тушгани учун эмас, балки бошқа сабабга кўра сариқ карточка кўрсатган:

"Винисиус рақс учун жазолангани йўқ. У трибунадан мухлислар улоқтирган буюмларни қайтариб ирғитгани учун огоҳлантирилди. Ҳакам ундан у ердан кетишни сўраган ва можаро келтириб чиқараётганини айтган, бироқ Винисиус бунга эътибор бермаган".

Моуриньюга "салом":

Итурральде Моуриньюнинг "Винисиус голни Ди Стефано каби вазмин нишонлаши керак" деган гапларига киноя билан жавоб берди:

"Моуриньюнинг нишонлашлар ҳақида гапириши жуда қизиқ. У Винисиусга Ди Стефанони ўрнак қилиб кўрсатмоқда, лекин ўзининг нишонлашлари-чи? Унга мумкин-у, бошқаларга йўқми? Бу шунчаки мантиқсизлик".

Ирқчилик — алоҳида мавзу:

Собиқ рефери майдондаги ҳиссиётлар ва ирқчиликни адаштирмаслик кераклигини алоҳида қайд этди:

"Келинг, фарқлайлик. Футболдаги ҳиссиётлар ва баҳслар — бу ўйиннинг бир қисми. Аммо ирқчилик ҳақоратлари — бу мутлақо бошқа нарса ва бунга асло йўл қўйиб бўлмайди".

Эслатиб ўтамиз, ушбу баҳсда Винисиус Жуниор ирқчиликка дуч келганини даъво қилган, Жозе Моуринью эса ўйин якунида ҳакамлар билан баҳслашгани учун қизил карточка олиб майдондан қувилган эди.