Мирзаҳаким Тўхтамирзаев "Интерфутбол" кўрсатувининг яралиш тарихи ҳақида сўзлаб берди

Устозимиз подкаст давомида ўз даврининг энг яхши дастурларидан бири — "Интерфутбол", шунингдек, "Пахтакор-79", афсоналар Биродар Абдураимов, Василис Хадзипанагис ва Ангрен Премьер-лигаси каьи мавзуларда маълумотларни тақдим этди. 

"1997 йил Ахбор ака Имомхўжаев уйларида ўтириб, "Интерфутбол"ни йўлга қўйиш масаласи ўртага ташланган. У пайтда ёзиб олиш имконияти телевидениеда мавжуд эмасди. Ҳеч ким бекордан бекорга вақт ажратиб, аппаратурани ажратиб, ёзиб бермайди. Уйда ўзимиз — Аброр Имомхўжаев, мен, Шароф Орипов кабилар оддий видеомагнитофонимизга, яъни лентали касетага телевизордан ўйинни ёзиб олардик. Кейин уни йиғиштириб берардик ва Шароф Орипов қизиқ учрашувлардан голларни териб чиқарди. Замонавий тилда айтганда, highlights қилинарди. Мен шу жамланмани шарҳлардим. Чамаси 45 дақиқалик кўрсатув бўларди. Кўрсатув учун ҳафта давомида сара ўйинларни касетага ёзиб чиқардик.

Раҳбарият телевидение кучини сезган ҳолда 1998 йилда Жаҳон чемпионатини намойиш қилиш ҳуқуқини сотиб олди. ТВ1 ва ТВ2, яъни ҳозирги "Ўзбекистон" ва "Ёшлар" телеканалларида ЖЧни узата бошладик. Биринчи каналда Азим ака ва Давлат Турдиалиев, иккинчи каналда мен ва Мурод Ризаев шарҳлайдиган бўлдик. Иккитадан ўйин берилса, бир кишидан ишлаганмиз. Фақат "Ёшлар"даги ярим финални Ахбор ака иккимиз шарҳлаганмиз. 

Кейин Жаҳон чемпионатини намойиш қилдик, техниклар ҳам сигнал ушлашни эплади, биз ҳам яхши шарҳладик. Раҳбариятнинг кўнгли тўлди, шекилли, 1998/99 йилги мавсумдан ЕЧЛ ва УЕФА Кубоги (ҳозирги ЕЛ) учрашувларини кўрсата бошладик. Ҳафта давомида манаман деган ўйинлар қўйиларди. Англия, Испания, Италия, баъзида Германия клублари иштирокидаги учрашувлар намойиш қилинарди", – дея эслади устоз Мирзаҳаким Тўхтамирзаев.

"90minutuz" подкасти тўлиқ ҳолда: