"Мен учун бу ўйин бошқаларига ўхшамайди. Менимча, бундай воқеа фаолиятда фақат бир марта содир бўлади, чунки бу Мессининг охирги ўйини. Бу жуда ўзгача баҳс. Бироқ бир нарсани унутмаслик муҳим: ҳа, биз бу ерда Аргентина ва Месси сабабли турибмиз, аммо биз ҳам ўз мамлакатимиз шарафини ҳимоя қиляпмиз. Биз Бенин номини ҳимоя қилиш учун келдик. Бу футбол: ўн бир киши ўн бир кишига қарши. Биз ғалаба қозонишимиз, дуранг ўйнашимиз ёки улар ютиши мумкин. Аргентинага сайёҳ сифатида эмас, балки ўйнаш ва курашиш учун келдик. Бу ҳаётимиздаги буюк кун бўлади.
Агар сўнгги дақиқада пенальти белгиланса ва уни Месси тепса, нима қиламан? Мен дарвозабонман ва вазифам — зарбаларни қайтариш. Ҳатто сўнгги дақиқада пенальти белгиланиб, тўп қаршисига Месси келса ҳам, мен уни қайтаришга ҳаракат қиламан. Ҳаммаси жуда оддий: бу менинг ишим. Ҳа, биз бу ерга Мессини олқишлаш учун йиғилдик, аммо ҳеч ким унга гол совға қилишимиз кераклигини айтмаган. Мен бундай қилиш ниятида эмасман. Ва Мессини билган ҳолда шуни айтишим мумкинки, унинг ўзига ҳам ҳеч қандай совғалар керак эмас. Агар у гол урмоқчи бўлса, бунинг учун бор имкониятини ишга солишига тўғри келади.
Месси ва Криштиану [Роналду]ни томоша қилиб улғайдик. Иккиси ҳам бизга футболда жуда кўп нарсани ўргатди. Улар узоқ йиллар давомида бир-бирлари билан рақобатлашиб келишди. Мен учун Лео — ушбу спорт тури тарихидаги энг яхши ўйинчилардан бири. Қироллардан бири.
Агар жамоамизнинг исталган футболчисидан сўрасангиз, ҳамма унинг либосини олишни истайди. Улар кўплаб либослар тайёрлаб, ҳар биримизга биттадан тарқатишса яхши бўларди, чунки либосни фақат бир киши сўраб оладиган бўлса, бу осон бўлмайди. Биз барчамиз уни хоҳлаймиз!", – деди Данжину "Marca"га берган интервьюсида.
Аргентина – Бенин учрашуви Буэнос-Айресда 7 октябрь куни Тошкент вақти билан 04:00 да бошланади.
