"Манчестер Юнайтед"ни кучлилар даврасига қайтарадиган 5 қадам. Қиммат ҳужумчилар — бошланиши

Аморим агарда МЮ трансфер ойнаси охиригача фаоллашмаса, жамоани топ-4га қайтара олмайди. Икки ҳужумкор футболчи – Кунья ва Мбеумо учун 150 миллион евро сарфланди. Қизиғи, улар "Манчестер Юнайтед" тарихидаги энг қиммат ТОП-10 харидлар қаторига кирди. Ҳар икки футболчи АПЛга кўникиб бўлган, бунгача ўртамиёна жамоаларни олдинга бошлай олган. Жамоа шаънини тиклаш йўлида муҳим икки қадамни ташлади, дейиш мумкиндек. Жамоа Европа Лигаси финалида "Тоттенхэм"га мағлуб бўлиб, АПЛда ўн бешинчи ўринни эгаллагач, руҳан анча мушкул вазиятда қолган. Аморим МЮнинг спарринг баҳсда "Лидс" билан ҳаракатларидан ҳам қониқмади, ўйин натижаси – 0:0. Рубенга янги футболчилар керак.

Хёйлундни қўйиб юбориб, бошқа "тўққизлик" сотиб олиш

АПЛнинг кўплаб клублари бу ёз айнан "тўққизлик" ролини бажарувчи ҳужумчиларни излашмоқда. "Арсенал", "Челси" ва "Ливерпуль" бу борада ишни бажарди десак, муболаға бўлмайди. "Манчестер Юнайтед" эса Кунья ва Мбеумо билан учбурчак ҳосил қилувчи энг юқори "чўққини" топиши зарур. Голлар танқислиги Аморимнинг АПЛдаги дебютини дабдала қилди. "Арсенал"да дарвозага аниқ йўлланган зарбалар ва голлар нисбати 0,37 – рейтингда биринчи ўрин. МЮда бу кўрсаткич бор йўғи 0,23 – охиридан биринчи. Хёйлундга ишонч билдирилди, лекин ёш даниялик масъулият юкини бир ўзи кўтара олмади. Ҳозирги вазиятда уни ижара жўнатиб, Расмуснинг ўрнига тажрибалироқ футболчини олиб келиш мантиқан тўғри бўларди. "Астон Вилла"даги Уоткинс рўйхатда биринчи эмасди, унда асосий мақсад сифатида "Арсенал"га ўтиши ҳал бўлган Гёкереш турганди. Аморим "Спортинг"да Виктор билан ишлаганига қарамай, швециялик "Арсенал"ни танлади. МЮ учун 29 ёшли англиялик форвард қолмоқда, у АПЛда улкан тажрибага ва анча кучли зарбага эга. Уоткинс тўғри янги Ван Перси эмас ва унинг голлари клубга чемпионатда ғолибликни келтириши ҳақиқатдан йироқ, лекин Олли жароҳат олмай турса, "қизил иблислар"ни яна ТОПлар қаторига қайтариши мумкин.

Онанани ишончли ва стабил ўйин кўрсатадиган голкиперга алиштириш

Андре хатолар билан бирга яшайди. "Интер" ва "Аякс"да камерунликнинг бошқа жиҳатлари унинг хатоларига кўз юмиш учун етарли эди. Онана кўпинча концентрацияни йўқотиб қўяди. Шунчаки аввалги клублари у МЮда бўлгани каби ўнлаб миллионлаб мухлислар нишони остида эмасди. Англияда Онанани кўпроқ қисман асоссиз хейтлар "синдирди". АПЛ ўтган мавсумида 132 та зарба, баъзи сейвлар ўта чиройли бўлди. Дарвозабон аниқ зарбаларнинг 68,9%ни қайтаришга муваффақ бўлди – ёмон кўрсаткич эмас. Фақат Онана "Манчестер Юнайтед" ҳимоясини бошқариш тугул, унга айтарли таъсир ўтказа олмаяпти. У қолганларни ўзига ишонтириб, олға чорлайдиган етакчи эмас. Андре бугунги кунга келиб, ҳимоячиларга ўз кучига, жамоа ҳимоясига ишончни бера олмаяпти. Жаҳон чемпиони Мартинес "Астон Вилла"дан Манчестерга кўчиб ўтган яна бир футболчи бўлиши мумкин, лекин бошқа номзодлар ҳам йўқ эмас. Аргентиналикнинг ўзига хос характери бор ва у ҳам баъзан кутилмаган хатоларга йўл қўяди. У 32 ёшдалиги ва 25 млн евро трансфер нархи ҳам унинг фойдасига ишламайди. МЮ скаутлари польшалик Булкани кузатишди. Бундан ташқари инглизлар Доннарумма ва Гарсияга оғиз солишганда рад жавобини олишди. Испаниялик "Барселона"ни танлаган бўлса, Жижжига эса мустаҳкам ҳимояси йўқ ва Чемпионлар Лигасида иштирок этмайдиган жамоа керакмас. 

Жалжалларга аралашиб қолаверадиган Антони, Санчо ва Гарначо билан хайрлашиш

Антони аёллар билан муаммоларга аралашиб қолганди, Санчо МЮни қамоқ деб билади ва клубдан кетишни, озодликка чиқишдек кўради. Гарначо эса Аморим жамоаси ичидаги гапларни ташқарига чиқиб кетишини таъминлаганлардан ҳисобланади. Уч нафар иқтидорли вингер ёзда Манчестерни тарк этиши керак. Ҳозирча фақатгина Рэшфорд жамоадан кетди. Маркус ижарага бўлсада "Барселона"га йўл олди. Даниялик хавбек Эриксен ва швециялик марказий ҳимоячи Линделёфга янги шартнома  таклиф қилинмади. Қария Жонни Эванс фаолиятини якунлади. Антони тен Хаг бошчилигида бўлса ҳам "Байер"га керак эмас. "Ювентус" Санчо трансфери бўйича музокараларни тўхтатиб туришга қарор қилди. Англиялик вингерни сотиб олиш учун италияликларнинг ўзи бир-икки футболчисини сотиб юбориши талаб қилинади. Қишда Гарначо молиявий талаблари билан "Наполи" раҳбарларини жаҳлини чиқарганди, ҳозир эса ёш аргентиналик АПЛнинг ўзида бошқа жамоа топишни орзу қилмоқда. Миш-мишларга қараганда футболчига "Тоттенхэм" ва "Астон Вилла" томонидан қизиқиш бор, лекин расмий ҳаракатлар ҳозирча амалга оширилмади.

Ўнг қанот ҳимоясига латераль олиб келиш

МЮ мухлислари учун яхши хабарлар ҳам бор. Ўтган мавсумдагидан ёмонроқ иштирок этиш ва ундан ҳам пастроқ ўринни эгаллаш деярли имконсиз. Таркиб янада кучайтирилди ва Чемпионлар Лигаси йўлланмаси учун курашишга ҳаракат қилиб кўрса бўлади. Бироқ рақобатчилар сони сезиларли ошган. "Астон Вилла" ва "Ньюкасл" тажриба тўплаб бормоқда, "Тоттенхэм"да эса янги мураббий Франк. "Ноттингем Форест" ЕЧЛ учун кураш темпига охиригача чидаб бериши қийиндир, лекин маълум даражада бу жамоа ҳам рақобат қила олади. "Кристал Пэлас" бошдан баланд сакрашини кутиш қийин. МЮ айнан "бургутлар"дан тажрибали Муньосни олиб кетиши мумкин. Колумбиялик АПЛга келганига кўп бўлмагандир, лекин "Кристал Пэлас" билан Англия Кубоги учун баҳсда "Манчестер Сити"ни ютди. Муньос – майдонда фаол ҳаракат қилади ва ҳужумда ҳам, ҳимояда ҳам фойда келтира олади. Амад ва Далот ўнг қанот латерали сифатида доим ҳам ишончли ўйин кўрсата олгани йўқ. Мазрауи ҳимояда анча ишончли, лекин марокашликнинг спорт формасига терма жамоадаги шериги Хакимининг кучайиши салбий таъсир кўрсатди. ПСЖ таркибида Ашраф нималар қилаётганини бутун дунё кўриб турибди. Ҳамма тушуниб турибдики, Мазрауи марокашликлар ичида ҳам ўз нуқтасида энг яхшиси эмас. Колумбиялик Муньос ўзининг пик формасидаги Дани Алвеш каби муаммонинг тайёр ечими эмас, аммо Аморим қанотлардаги вазиятдан ташвишда. Чап қанотга 18 ёшли парагвайлик Диего Леонни топишди.

Майдон макразида ўйинни назорат қила оладиган диспетчерни топиш

Энг қийин вазифа. Скаутлар учун энг мушкул иш – Хави, Пирло ва Модрич позициясига футболчи топиш. У бир вақтнинг ўзида ҳам ҳужум қила олиши, ҳам ҳимояланишни билса. "Манчестер Юнайтед" таянч зонасида тажрибали Каземиро бор. Бразилиялик спорт формасини анча тартибга келтириб олди, лекин 33 ёшда хавбек "Ал Насср"га кетиш ҳақида ўйламоқда. Ўйин темпи АПЛникидан пастроқ чемпионатда, Роналду билан бир жамоада футболдан завқланиш осонроқ бўлади. МЮда маҳоратли диспетчер Бруну Фернандеш бор. У шайхларнинг катта пулларини рад этди. Португалиялик АҚШда ўтадиган ЖЧга тайёргарлик кўрмоқда. Бруну жамоанинг янги ҳужумчилар учлиги ишлаши учун қўлидан келган барча ишни қилади. Бироқ Фернандеш терма жамоадаги ҳамкасби Витиньянинг нуқтасида ҳаракат қилмайди. МЮга эса айнан шундай футболчи зарур. Кобби Майну йигирма ёшида асосий таркибда ўйнашни истайди, лекин у бошқачароқ характердаги ўйинчи. 

Бешинчи вазифанинг яна бир ўта мушкул томони – аниқ номзодлар йўқ. Бу ролни бажара оладиган футболчилар Чемпионлар Лигасида иштирок этмайдиган жамоага ўтмайди. Аморим куни-кеча МЮ ўйинига темп етишмаётганини айтиб ўтди. Жамоа ҳаракатларини бошқарадиган, назорат қила оладиган футболчи етишмаяпти. Угарте ва Майну фаолликни таклиф қилишмоқда, аммо "қизил иблислар"га Родри сингари ўйинни қаердадир тезлаштирадиган, керак жойда эса тинчлантирадиган йигит керак. Испаниялик Хавьер Геррага эътибор қаратилди, аммо бўйдор футболчи 22 ёшда ҳали катта тажрибага эга эмас. Қидирув давом этмоқда, вақт эса тобора кам қолмоқда. Уч ҳафтадан кейин МЮ АПЛда "Олд Траффорд"да "Арсенал"га қарши ўйин билан стартга чиқиши керак.